Aizawl: Tuichang biala MNF MLA candidate Tawnluia chuan, “Kan khawtlang nun tibuai a, Zoram titaptu zu zawrh hi kan sawrkar chuan a titawp ang a. Ruihhlo doin ruihhlo ngaite chhanchhuahna beihpui kan thlak ang a, Sethawna ruihhlo ngaite enkawlna khu kan tichangtlung ang. Sikul timing Mizo nunphung leh chawei dan milin kan siam tha ang a, Kristian sakhua kan humhalh tlat ang,” a ti.   Nimin Khawzawl Zaingen YMA Hall-a an party campaign kick off-ah he thu hi sawiin Tawnluia chuan, “Zoram mipuite tan SEDP kan buatsaih a, he intodelh programme hmang hian Zoram hi kan kaihruai ang a, kan kutkawih ngeia intodelh leh Lalpa rawngbawl hi kan sawrkar chuan kan tum a ni,” a ti bawk. Thusawitu dang MLA Lalruatkima pawhin, “Tun sawrkar kan hrawn mek hian chung lam leh Zoram pawi an khawih avangin kohhran ten ‘yellow card’ an pe mek a, kan hmalawk inthlan lo awm turah hian mipui ten red card pein an sawrkar hi an titawp dawn a. Pathian leh mipui zarah kan sawrkar ang a, ration chini kan sem leh dawn a, SEDP kaltlangin sawhthing leina mai ni lo, kuthnathawktute dinchhuahna Dar kan vaw dawn a ni,” a ti bawk.