ZALEN, December 24, 2025: Tukin zing khawvar hlim khan Mizoram Police, Excise & Narcotics department leh Central YMA tangkawp chuan Aizawl khawpui hmun hrang hrangah ruihhlo ngaite an vai khawm a, mi 100 chuang khawmin Tawngtai Bethel Camping Centre (TBCC), Sakawrtuichhun-ah dah tum an ni.

ZALEN thudawn danin tun hnaia Home Minister K.Sapdanga hova Excise & Narcotics Minister Lalnghinglova Hmar, Mizoram Police, Excise & Narcotics department leh Central YMA hruaitute thukhawm thurel bawhzuiin tukin (December 24, 2025) khawvar tirh atang khan team hrang hrangah insiamin ruihhlo ti thinte punkhawmna hmun - Vanapa Hall bul, Dawrpui thlanmual, Lammual chhehvel, Bawngkawn, Falkland veng leh hmun dangah te insemdarhin vai khawm hna hi an thawk a ni.

Hriat theih chinah mi 100 chuang man khawm tawh niin heng mite hi police leh Excise & Narcotics department lirthei hmangin phurh khawm an ni a, ei tur pek an nih hnuah TBCC-ah phurh tura ruahman mek a ni.

Ruihhlo ti thinte vaikhawm hna hi a tul angin thawh chhunzawm zel tum nia thudawn a ni.

Excise & Narcotics department chhinchhiah danin kumin January 1 atanga December 17, 2025 thleng khan Mizoramah ruihhlo vanga thi mi 88 an awm tawh a, heng mite hi mipa 74 leh hmeichhia 14 an ni a. Thi zinga 34 hi heroin vanga thi an ni a, a dang 54 hi heroin leh ruihhlo dang tih pawlhte an ni.