Kum 7 V Day thisen pek unit 3700 tling tawh Aizawl: Nimin zing khan Finance Minister Lalsawta chuan Central YMA Office tualah SRS te ruihhlo mankhawm Rs. 27,66,800 hu a halral. Ruihhlo halral inkhawm, CYMA Vice President Vanlalruata kaihhruaiah hian thu sawiin Lalsawta chuan, “Mizoram chu khawvela in runna hlauhawm ber, ruihhlo hmanga run in a awm mek a ni,” a ti a. Mizoram ramri hmun thum a thena hmun hnih vel lai chu international border a nih bakah, awlsam taka kalpawh theih, khawmual vek a nih miau avangin sawrkar tan pawh a luhaithlak khawpin ruihhlo tawlh ruk a hluar tih sawiin, ruihlo do turin sawrkar, tlawmngai pawl leh mipuite tanrual a ngai tih a sawi. Ruihhlo dona kawnga YMA hmalakna fakin Minister chuan, “Mite huat hlawh khawp a YMA-ten an man khawm, ruihhlo kan halral tur hi a bul tanna chauh a ni a, sawrkar-in theihtawpin hma a la dawn a ni,” a ti bawk. CYMA General Secretary Lalhma-chhuana chuan ruihhlo do kawnga an hmalakna leh an harsatna tawhte tarlangin, “Dan hnuaiah chuan kan thuneihna piah lam a ni tih hre mahila, dan hnuaia thawktute tichak tura ruihhlo kan do hian, ram leh hnam humhalh tura pen chhuak te’n kan tih loh tur ti-ah kan in ngai lo a ni,” a ti a. Mizoram sawr- kar chu Drugs policy leh Drugs control-na tur dan mumal siam thuai an duh tih leh Magistrate-te pawhin tuna dan awmsa hnuaiah pawh sawrkar leh tlawmngai pawlte chu ruihlo do kawngah thahnem ngaihpui deuh se a duh thu a sawi bawk.