Aizawl: Nimin zing dar 7:30 khan SRS in thl 4 chhunga ruihhlo an mankhawm Rs. 1,03,31,000 hu chu Central YMA Office kawtah Commissioner Lalngaihawmi, Territorial Commander Salvation Army in a halral. Ruihhlo halral inkhawm hi CYMA Finance Secretary leh SRS Covener thar, Lalrochuanga Pachuau chuan a kaihruai a, Central YMA President Lalbiakzuala chuan zu phalrai hnuah ruihhlo a kiam chuang lo nia sawiin ruihhlo do kawngah YMA chuan hma a la zel dawn tih a sawi a. SRS hmalakna fakin an hnathawh vangin nunphung pangngai zawh tam tak an awm tawh niin a sawi. Com. Lalngaihawmi chuan ruihhlo chu Diabola hmanrua a ni tiin SRS te inpekna fakawm a tih thu a sawi bawk. Lalngaihawmi hian SRS tanpui nan Rs. 20,000 a hlan bawk. Nimina halral tak ruihhlo te hi SRS 3rd Batch ten March ni 5,2016 atnga July ni 5,2016 inkar chhunga an mankhawm Heroin hawng 105.5, can 810, chhinsen 69, Alprozolam 205 strip, ganja 1.5 kgs leh Katamine mum 20000 te an ni a. Hemi hunchhung vek hian ruihhlo kaihhnawih ah mi 589 man an niin home-ah 50 dah an ni a, Excise ah mi 12 leh Police ah mi 1 an pe a, mi 442 chu Counselling an neihpui bawk. 3rd Batch chhung hian SRS hian mi hrang hrang hnen atangin tanpuina sum Rs. 2,36,700 an hmu bawk a ni.