V. Lalnunthara (Mathara),
Founder President, Foundation For Drug-Free Mizoram

Ruihhlo Dona Ni - International Day Against Drug Abuse And Illicit Trafficking kan lo thlen hian Ruihhlo dona kawnga, kawng hrang hranga thawktu pawlte chibai ka buk a che u.
Ruihhlo Dona Ni hi kum 1989 atang khan hman tan a lo ni tawh a. Kumin thupui hi ‘Better Knowledge For Better Care’ tih a ni a. Ruihhlo dona kawngah hian a kum telin, tawnhriat lo pung taah hian thlir dan tharte a rawn awm zel ta bawk a. Ruihhlo dona kawngah hian hriatna tha leh zau zawk kan neih chuan a hmachhawn dan kan lo thiam zel dawn tihna pawh a ni thei ang chu.

Ruihhlo dona kawngah hian kan ramah sorkar leh khawtlang kan tangrual tha a, YMA in theih pa tawpin hma an la bawk a. An inpekna a fakawm hle a ni. Ka pian leh seilenna leh a chhehvel hi kan naupan lai atanga Lawilo Dawrpui an tih ang mai khan sualna hrang hrangin a chiahpiahna hmun a nih avang hian tawnhriat mak pui pui hi a lo piang lo thei lo va. Harsatna nasa taka ding mek kan Mizo unau leh tlangvalte ngei han hmuh a, han kawm hian eng emaw tak ruak chu an nunah a thleng thin tih hi a pawmawm hle a ni. Awle, Mizoramah hian ruihhlo dona atana ke pen pawl hrang hrang an awm a, anni hma lo lak tawhna leh inpeknate hi a chhuanawm hle a, rah duhawm tak pawh kan hmu thin reng a ni.

April ni 1, 2019 khan Foundation For Drug-Free Mizoram chu a lo piang ta a. He pawl hian kum khat hmel chauh a la hmu a, pawl naupang tak a ni. He pawl hian a tum ber chu kan thalaite hian Ruihhlo tel lo Nun Duhawm Zawk an neih theihna turin theihtawpin hma a la a ni. Kum khat chhung hian zirna in School leh Sunday School/Y.P Corps-ah te kalin; zirlai naupang, hmabak eng tak nei te hnenah ruihhlo that lohzia zirtirna (awareness) pek an ni. He pawl hian kum khat chhungin School 23 leh Sunday School/Y.P Corps 2 tlawhin, naupang mi 5,000 chuangte hnenah zirtirna pek an ni. He hun hi a naupangten tha taka an ngaihthlak theih nan hlimawm tak si, a hlawk thei ang ber ni bawk siin hun hman thin a ni a. Naupangten an ngaihsan tur mi chhuanawm tak takten an telpui thin bawk a ni. Hun tawp ah zirlai naupang ten an duh thu ngei a thutlukna siamtirin, ruihhlo tel lo nun duhawm zawk nei tura intiam hi za a 90 chuang an ni thin a, a lawmawm hle a ni.

Zirna in 20 chuang kan tlawhnaah hian thu lawmawm tak leh he pawl min tiphur em emtu chu school kan tlawh zinga zaa 80 chuan ruihhlo that loh zia inzirtirna, Drug-Awareness Campaign hi an lo la nei ngai meuh lova. Hei hian zau zawka thawh a tulzia a tilang a, he hun nelawm loh tak ata hi Pathianin hun tha zawk min la pe ngei ang a, Aizawl chauh nilo Mizoram a zirna inte la tuam chhoh zel kan tum a. Foundation For Drug-Free Mizoram hi zirtirna pe tura sawm theih reng kan ni a, heti lama ram siam duh, kan awm ve ngeiin ka ring a. Rawn tel ve turin kan sawm che u a ni.

Awle, ram tan thawh tur a tam hle mai. Heng kan zirlai naupang tlawh tawhte an dinhmun en zui a, an intiam tawhnaahte an la ding nghet zel em? Chhungkua leh mi mal harsatna tawh vanga tanpui zui mamawh takte an awm? Thing phun a, ngaihsak zui a tul ang chiah hian heng kan zirlai naupang, kan ram nghahfakte hi ngaihven zui a, nun duhawm zawk an neih chhoh zel nana kaihruaitu leh tanpuitu hnai takah an awm reng tih hi an hriat a, an tana awm hi kan duhthusam a ni. Zirchianna hrang hrang atanga a lan danin, khawvel huapin thalai kum 25 an tlin tawh hnu a, ruihhlo hmansualna a lut tan ta hi an tlem hle a ni. Chuvangin, naupang leh rawlthar/tleirawl an nih chhoh lai atanga ruihhlo ti lo tura zirtirna awmze nei leh intiamna an neih hi a mamawh takzet a ni. Ruihhlo Dona Ni kan lo thlen hian, ruihhlo dona atan kawng khat talin, inpekna thar nen kan tu kan faten ‘Ruihhlo tel lo Nun Duhawm Zawk’ an neih ngei theihna atan, ngaina takin tan i la thar leh teh ang u, tiin kan insawm a ni.