ZALEN February 2, 2026: Myanmar raltlan zingah tam tak chu drug tawlhrukah an inhnamhnawih nia ngaihdan a awm laiin ZALEN in Police leh Excise document a lakchhuah atangin 2.9% chauh drug kaihhnawihah man an ni tih a lang thei.

ZALEN in kum 6 chhung (2020-2025 May) chhung document a lakchhuah khaikhawmna atanga a lan danin drug kaihhnawiha mi 4815 man zingah 140 chu Myanmar mi an ni a, 2.9% chauh an tling a.

Mi 140 hi Myanmar raltlan an ni vek kher em tih erawh hriat theih a ni mai loh nangin an nih vek a rinawm loh a. Raltlan tam tak ruihhlo tawlha inhnamhnawih anga ngaihdan awm chu ngaihdan dik ziktluak lo anih hmel ta riau a ni.

Ratlan vanga crime rate a pun phah nasa nia ngaihdan awm finfiah turin ZALEN chuan hemi lam hawi bawk hian police record kum 5 chhung (2022-2025 November) a la chhuak bawk a. Myanmar mi dan bawhchhiatna avanga man zat chu kum 2022 ah 85 (mi man total 3218), 2023 ah 95 (mi man total 3273), 2024 ah 95 (mi man total 2918) leh 2025 ah 118 (mi man total) 2544) a ni a. Kum 5 chhung 'trend' thlir hian dan bawhchhia Myanmar mi man hi a danglam tehchiam lo a, kum 5 chhungin Myanmar mi man 393 an tling a. Mizoram Police te'n dan bawhchhia an man zawng zawng zat chu mi 11,953 an ni a. Hemi atanga chhut hian Myanmar mi dan bawhchhia man (393) chu 3.2% vel chauh a ni bawk a ni.

Mi tlemte awm tha duhloin a nawlpui hmingchhiatna a thlen tih sawrkar data atang hi chuan a lang a ni.

CYMA hian kum 5 chhung teh meuh raltlan an buaipui tawh a. 'Raltlan zingah hian camp a awmte chu drug tawlh lamah an fimhlim tlangpui chuan kan hria a, an awm pawhin tlemte an ni ang. Eng emaw thu leng vak a awm pawh hian an ralti hmaa an ngaihven a, tam tak hi chuan haw an chak tawh a. Hetih lai hian raltlan anga awm, ramri leh khawpui inkar che reng an awm bawk a, heng hi thlir zui ngai an ni khawp mai,' tiin Prof. Malsawmliana, Secretary, CYMA chuan ZALEN a hrilh bawk a ni.

Hetih lai hian ruihhlo man erawh kum 5 chhung hian nasa takin a pung deuh vek a. Heroin (No 4) chu 2020 ah kg 20 man anih laiin kum 5 hnuah chuan kg 126 a let 6 (600%) aia tam a ni tawh a. Methamphetamine pawh kum 5 chhungin a let 4 (400%) pung tawh bawk. Hei hi Manipur buai avanga ruihhlo tawlhna kawng inthlak vang nia ngaih a ni.