February 20, 2023; Mizoramah kumin thla 1 leh a chanve chhungin ruihhlo (heroin) vanga hi mi 19 an awm tawh a, chu chu nikum 2022 chhunga ruihhlo vanga thi zat zahve deuh thaw a tling pha.

Excise & Narcotics Department (END) chhinchhiah danin, Mizoram ah kumin February ni 16 thleng khan ruihhlo vanga thi mipa 17 leh hmeichhia 2 an awm tawh a, an vaiin heroin vanga thi an ni. 

Hetihlai hian nikum 2022 chhung khan heroin vanga thi mi 43 an awm a, kumin thla 1 leh a chanve chhung chauh va ruihhlo vanga thi chhinchhiah mi 19 te aiin mi 5 chauhin an tam. 

Kum 1984 atanga chhutin Mizoramah ruihhlo vanga thi mi 1736 an awm tawh a, chung mite chu mipa 1,531 leh hmeichhia 205 an ni.

Hetihlai hian Central YMA hnuaia ruihhlo do pawl 'Central Anti-Drugs Squad' (CADS) second & interim batch ten an hun chhungin ruihhlo chi hrang hrang kaihhnawihah mi 502 man an nei a. Second Batch & Interim Batch hun chhungin Heroin, hawng 633, Khuh dawmdawi bur 56, AP mum 919 an man a. Heroin an man te hi tualchhunga hralhna rate in Rs. 3,87,39,600 man hu a ni.

Heng an thil man kaih hnawihah hian mihring 502 man an ni a, Police leh excise ah 37 pek an ni a, home ah mi 18 dah an ni a,  mi 374 counselling pek an ni bawk. 

Mihring mante hi Aizawl veng hrang hrang 70 leh Aizawl pawn 14 atangin an man a, mihring man, za zela 95 vel chu nu emaw pa emaw nei tawh lo an ni a. Za a 40 vel chu HIV /AIDS positive, a then chu ART la lai mekte an ni.