ZALEN Oct 7, 2025 : Kumin January atanga October ni 6 thleng khan Mizoramah ruihhlo vangin mi 65 an thi tawh a, heroin leh a kaihhnawih vanga thi an tam ber. Ruihhlo vanga thi te hi kum 19 atanga kum 57 inkar an ni.

Excise & Narcotics department-in a chhinchhiah danin, kumin January atanga tun thla ni 6 thlenga ruihhlo vanga thi te hi mipa 54 leh hmeichhia 11 an ni.

Excise & Narcotics Department-in Mizorama ruihhlo vanga thi a chhinchhiah tan kum 1984 atanga kumin thlengin Mizoramah ruihhlo vangin mi 1944 an thi tawh a, an zinga mi 1707 te chu mipa niin, 237 te chu hmeichhia an ni a, ruihhlo vanga thi zingah kum 14 mi chu a naupang ber a, kum 58 chu a upa ber thung.

Kum 2004 kha Mizorama ruihhlo vanga thi an tam ber tum niin mi 143, mipa 122 leh hmeichhia 21 an thi a, khatih hunlai khan proxyvon chu an thihpui tam ber a ni a, kum 2015 chho atangin ruihhlo vanga thi zingah heroin vanga thi an tam tan a. Kum 2005 hnulamah kum 2023 kha ruihhlo vanga thi an tam leh ber tum niin, mi 76 in ruihhlo vangin nunna an chan a ni.