ZALEN October 26, 2025: Mizoram Police chuan ruihhlo do beihpuim ‘Operation Against Trafficking & Use of Drugs & Narcotics’ thlak tan, September 1, 2025 atanga October 20, 2025 thleng khan ruihhlo chi vaibelchhe 16 chuang hu an man tawh.

Police thuchhuah tar lan danin ruihhlo kaihhnawihah mi 71 man niin 56 hi Indian an ni a, ram dang mi 15 awmin case 50 ziah luh a ni.

Police thuchhuah chuan Mizoram chhungah ruihhlo veivak a pun nasat avanga sawrkarin ruihhlo do beihpui a thlak chu ngawrh taka kalpui zel a ni.

Ruihhlo do beihpui kalpuiah hian Myanmar ramria inkalpawhna leh ramri dep khuate ngaih pawimawh hmasak a ni a, ramri kâna ruihhlo lut thin dang chat tura beih niin tual chhungah pawh dap leh a tawlhte chhui hna thawh zel a ni.

Excise & Narcotics Department, Special Narcotics PS leh Central YMA atanga thu dawn danin tual chhunga ruihhlo leng vel tlahniamin a zuar pawh an tawmim tan niin hriat a ni a. Khawlaia heroin hawng khat man Rs. 25,000 vel ni thin pawh tunah hian Rs. 40,000 vel a kai niin an sawi.

Police thuchhuah chuan ruihhlo do beihpui hi thla li chhung, September, 2025 – December, 2025 kalpui phawt tura ruahman a ni a, tun aia a hlawhtlin leh zual theihna tura thawhpui turin mi zawng zawng an sawm tih an sawi.