Aizawl district Superintendent of Police  chuan tunhnai khan Press mite kawmin tunhnaiah Aizawl khawpuiah dan bawhchhiatna/ pawikhawihna kum dang aia a hluar thu leh chung zingah chuan rukruk case a tam fal hle thu a sawi a. January 1, 2022 atanga March 31, 2022 chhungin Aizawl khawpui chhunga Police station 4 ah case 572 register tawh a nih thu sawiin heng zinga case 397 (69.64%) hi rukruk case a ni tih a sawi bawk a ni.

Aizawl SP thusawi hian ngaihtuah a ti thui a, eng vanga rukruk hi hluar ta nge tih chhut ngun a ngai khawp mai. Rukruk a hluar chhan hi hri pui vanga rukru mi tam tak, jail a tawt vanga chhuahtir an nih vang anih a rinawm a. Court chuan hrileng laka jail tang te an him zawk nan leh inkaidarhna a thlen tlem zawk nan case tenau nei mi tam tak a chhuah tir a, heng zingah hian rukruk case nei thahnem tak an awm avangin heng jail tang chhuak te hian an thiltih thin ruk ruk hna chu an thawk leh anih a rinawm.

A dang lehah chuan hri vanga kan inkharkhip thin chu hri a ziaawm ta nia a lan avangin chhuakvak kan tam a, hnathawk peih lo leh misual te a hma aia an zalen tak avangin rukruk hi a hlaur anih a rinawm. Chumai bakah ruihhlo a tamin a zalen em em mai a. Heng ruihhlo ti thin ho hian awlsam taka an ruihhlo tihna tur an lei theihnan rukruk hi an ching ta a ni. Hei mai bakah hian mi tam tak chuan ruk a ni tih hrerengin an lei duh zel mai a. Hei hian rukru te a ti huangtau niin a lang bawk. Thil vanduaithlak leh deuh mai chu Aizawl khawpuia CCTV hi hmantlaka bar a awm lo tlat mai a, hei hian thilsualtitute manchhuah kawngah harsatna a siam bawk a ni.

Rukruk venna leh rukru te manchhuah kawngah mipuite thawhpuina Police te hian an mamawh hle mai a. Mahni in leh a velah te CCTV uar lehzuala dah a pawimawh hle bawk. rukru manchhuah kawngah hian theihtawpa mipui ten Police te kan thawhpui a pawimawh hle mai. Veng hrang hrangah tlawmngai pawl YMA, JAC, VDP etc te an awm vek a, heng pawl hrang hrang te hian tangruala Police kan thawhpui phawt chuan rukruk leh pawikhawihna thleng thin te hi a tlahniam ngei ngei ang tih a rinawm.