May 10, 2023; Mizoram police te chuan tunhnai ah rukru hrang hrang man an nei nual a. Mi thil ruk ni ngeia rinhlelh lo leisaktu chu dan hnuaia hrem theih an nih thu te, ruihhlo mamawh phuhruk nan thil sual dang, a bik takin mi thil rukna kawngah ruihlo ngaite a hruai lut thin niin police thuchhuah ah tarlan a ni. 

Police thuchhuah tarlan danin, May 9, 2023 zan dar 12:30 vel khan Skechers Showroom, Zarkawtah misual tukverh atanga lutin pheikhawk, bag leh pawisa Rs. 3,000 ruk a ni a. He thila inhnamhnawih Jonathan Lalnunfela (21), Bunghmun Venglai (P/A - Dawrpui West, Aizawl) chu Aizawl PS ten Dawrpui Khawtlang duty-te puihnain an man a, a thilruk - pheikhawk pair 26, bag 7, fenny pack 2 leh pawisa Rs. 1,600 (a vaia Rs. 2,16,340 hu) chu hmuhlet a ni. 

23.03.2023 zan khan misual tu tih hriat loh chu Phura Vathlo Vaih-a an chennaah an awmloh hlanin tukverh kalhna tichhiaa lutin steel almirah-a dah OST (Opioid Substitution Therapy) box 23 ruk a ni a. OST hi Health Department atanga OST client te hnena sem tura dawn a ni. He thila inhnamhnawih Vanlalruatfela (23), Phura Vengthar chu man niin, thuzawhfiah anih hnuah a thilruk box 23 atangin strip 60 hmuhlet a ni.

28.04.2023 zan khan misual tu tih hriat loh Govt. Primary School, Borai, Mamit District-ah tukverh tichhiaa lutin  classroom pahnih atangin ceiling fan pahnih ruk a ni a. 3.5.2023 zan khan he school-ah bawk hian tukverh tichhiaa misual lut lehin, ceiling fan pahnih dang ruk a ni leh bawk. He thila inhnamhnawih Anil Kumar Reang (28) s/o Putorojoy Reang, Bahadurpara, North Tripura chu Kanhmun PS ten manin, a ceiling fan pali ruk pawh hmuh let a ni.

2.5.2023 khan an Company Godown ‘Beton Hume Pipe Factory’, Sesawng Maumit kawn ami chu misualin rawkin hmanrua engemawzat (machinery tools, v/o Rs. 2,00,000) an ru bo a. Rang taka chhuizuiin he thila inhnamhnawih Fimchawisanga, Sesawng Tlangveng nia inchhal chu Bawngkawn PS ten manin a thil rukte pawh hmuhlet a ni.

30.04.2023 zan khan Kolasib Venglaia lirthei pakhat (TATA ACE) atangin battery (Exide) ruk a ni a. Ngun taka chhuizui nghal vat niin, thirchhe lei thin mi pahnih - Rakib Hasan (28) and Tinku Mia (26), Madhurbon, Cachar, Assam (P/A - Venglai East, Kolasib) ve ve te hnen atangin lirthei battery ruk ni ngeia hriat panga lai hmuhchhuah a ni. Chhuizuina leh zawhfiahna kal zelah he thila inhnamhnawih (a rutu) Lallawmsanga (26), Diakkawn, Kolasib chu man chhuah zui a ni a, tunhnaia Kolasib khawchhunga lirthei battery rukna case pahnihah a inhnamhnawih bawk tih hriatchhuah a ni.

Zamuang, Mamit District-a cheng pakhat atanga complaint an dawn angin, 30.4.2023 tlai khan a dawr chhunga refrigerator chunga dah mobile phone pakhat chu ruk a ni a. Rang taka chhuizuiin he thila inhnamhnawih K.Lalrinawma (28), Mamit Field Veng nia inchhal chu man nghal niin a mobile phone ruk pawh hmuhlet a ni.

29.04.2023 khan Field Veng Serchhip a cheng pakhat hnen atanga FIR dawn niin, 26.04.2023 zingah misual an chenna In-ah lutin bed room atangin Rs. 4,000 ruk a ni a. Rang taka bawhzuiin, he thila inhnamhnawih Malsawmdawngzela (20), Chanmari Veng, Serchhip chu Serchhip PS ten an man nghal a, a pawisa ruk erawh ruihhlo lei nan a lo hmangzo tawh a ni.