Aizawl: Tunkar Nilaini (20.9.2017) a rulin a chuk Lalramdina (26) s/o Donchorai, Darlak khua chu a la thi lo nia a chhungten an hriat avangin nimin tlai thleng khan vui lovin la enkawl mek a ni. Darlak atanga thudawn danin Lalramdina hi an feh haw Rulngan nia hriatin a chuk a, Mamit Hospital panpui nghal a ni a. Nimahsela kawng chanve vel an thlen pui laiin nikhua a hre lo tan a, Mamit Hospital an thlen meuh chuan doctor te'n an chhan hman ta lo va, rul chuk chu a thihpui niin an sawi. Mahse Lalramdina hi a thi lo nia hriain ramhmul damdawi hmanga rul chuk enkawl thiam chuan an enkawl a, nimin kha chuan a enkawltu chu a beidawng tawh a, mahse mi thenkhat ten a mar a la awm nia an hriat vangin he chanchin buatsaih lai thleng hi chuan vui a la ni lo. Darlak khua hian Health sub-centre an nei a, mahse rul chuk enkawlna tur hmanrua a awm lo. Hei vang hian rul chuk emaw rannung seh an awm anih chuan an khua atanga enkawlna hmun hnai ber Mamit Hospital an pan mai a ngai a ni. Darlak YMA Secretary C. Lalthlamuana chuan an khaw sub-centre ah rul chuk leh rannung seh ang chi enkawlna turin an khaw sub-centre-in hmanrua a nei tha tawk lo niin a sawi a. Hei vang hian damdawi awm thatna hmun Mamit an panpui mai ta niin Zalen a hrilh. Health Minister chuan rul chuk leh rannung seh avanga boral an awm thin chu a ngaimawh vangin tibo turin ta a la niin Health Department hotute chuan Zalen an hrilh a. Hemi titawp tur leh a rang thei ang bera thingtlang lam mite pawhin enkawlna an dawn theih nan Hospital zawng zawng bakah Primary Health Centre leh Sub-Centre zawng zawngah rul chuk leh rannung seh enkawlna tur hi dah vek a nih theih nan hmalak mek a ni a, hmun thenkhatah erawh harsatna avangin a la awm kim thei lo niin an sawi bawk. Aizawl Civil Hospital casualty-a thawkte chuan rul chuk case chu a awm ve zeuh zeuh reng niin an sawi a. He hmuna doctor duty pakhat chuan rul chuk chu a rul azir te, a tur chak dan a zir te in enkawl dan chi hrang hrang a awm niin a sawi a. “Rul chuk avanga casualty rawn pan te chu an thisen enfiah turin thisen lakchhuah sak an ni a. Dam tha pangngai chu reilote ah an thisen a khang thin a, rul tur an hua a nih chuan a khang thei lo thin a, hetiang anih chuan an mamawh tawk tur anti-venom injection kan pe mai thin,” tiin a sawi a, inenkawlna rawn la vat te chuan an thihpui lo tlangpui niin a sawi. Hmanrua a awm chuan rul chuk hi tihdam leh enkawl dam theih a ni a. Sawrkar hmalakna kal zelah Hospital zawng zawng leh PHC te, health sub-centre-ah te he damdawi hi dah vek a ni dawn niin thuneituten an sawi bawk.