Aizawl March 6, 2023: Vawiin khan ZPM chhung inkhawm neih a ni, he hunah hian ZPM Frontal te buatsaihin ZPM MLA te chu Assembly session zawng taka an chetha tiin chawimawina hun an hmang, ZPM Leader Lalduhoma chuan mi thar lawm lutin thu a sawi a, rulling party te chu an thangkamah an awk zel tiin, an thusawi an khak fuh hlei thei lo niin a sawi.

Lalduhoma chuan, “Session zawhfel takah headquarters-in tha taka min thlawpna avangin kan lawm a, party mipui mai ni lo, party pawn lam thlengin mi hrang hrangte puihna kan dawng nasa a, min tawngtaipuitu zawng zawngte chungah ZPM MLA te chuan lawmthu kan sawi tak meuh meuh a ni. Chu mai nilovin vawiinah kan phu loh chawimawina min hlan a, Assembly House-ah ram tana theihtawp kan chhuahnate min ngaihhlut sak a, kan lawm hle a ni,” a ti

Rulling party chu che fuh hlei thei tawh lova sawiin ZPM Leader chuan, “Kuminah hian Vbc 640 sum indaih lohna nei sain bul kan tan a, leiba tam tak neiin kum 50 thlenga mipuite rulh tur sum an puk a, sawrkar leh tur tan pawha huphurhawm khawp leh hnual rawihna tur ba an hnutchhiah dawn a ni. Sum enkawl kawngah leh hmasawnna kawngah he sawrkar hi a hlawhchham thak a, hetiang sawrkar hi kan la hriat ngai loh a ni. Ruling party hi anmahni thangkamah an awk zel a, an thusawiin a khak fu hlei thei tawh lova, an tum a fu thei tawh lova, anmahni hi an inbeitawk hle tawh a ni,” a ti bawk. 

Direct Funding chungchang sawiin, direct funding a nih angin Mizoram sawrkarin a lo hman ngawt theih a ni lova, a dawngtu turte hnenah pek zel tur a nih thu te Pekchhuah hun tur chhung bituk a awm a, chumi hun chhunga sawrkarin a pek chhuah loh chuan penal interest an ti a, a pung an chawi a ngai a, chu chu direct funding thatna niin a sawi. Financial management  tihchhuah tharah phei chuan ni 21 chhungin an hlan zel tur a ni, tih ni ta a;  A dawngtu turin ni 21 chhungin lo dawng ta lo se, sawrkar hian thil dangah hmangin lo pawtpeng ta sela, sawrkar hnen atangin central-in a chhuhsak leh dawn tihna a ni a, chhuhsak leh mai kha a ni lova, a dawt leh kha a lo kal leh thei dawn lo tihna a ni. Chutiang khawp chuan central hian kalphung thar  an rawn hmang chho mek niin a sawi.