Russia sipai commander hlun tak pakhat chuan Ukraine chhum lam leh Donbas chhak lam chu awp ngei an tum tih a sawi.

Maj Gen Rustam Minnekayev chuan an state media hnenah Moscow in a tum chu 2014-a an lak Crimea chu khawmuala atang luh a ni tih sawi a, Russia-in a thlawp, Moldova-a Transnistria bial chhung chu Moscow tana awlsam taka luh theih turin siam an tum tih a sawi tel bawk. Transnistria hi Ukraine khawthlang lam ri-a awm a ni.

Hetihlai hian Gen Minnekayev-a thusawi hi Kremlin-in a pawmpui a ni chiah em tih a sawi a, mahse, a thusawi hi Russian state media lama chuan a lar hle a, Interfax leh Tass news agency te pawhin an tarlang bawk a ni. 

Russian defence official te chuan BBC hnenah general comment hi an bawhzui tih an sawi a, an sawi hi a dik anih chuan Russia hian an thiltum hi rang taka an kalpui mai rin a ni.

Hetihlai hian EU official te chuan Ukraine chhak lam leh chhim lam tuipui kum lam an nawrna chu an tihnat zual an rin thu an sawi a, kar hnih chhung vel indona lo awm tur hian thil thui tak a hril turah an ngai.

Moldova chuan an rama Moscow ambassador hnenah hemi chung-chang hi an zawtfiah nghal a, an foreign  minister chuan;'ngun taka ngaituah ngai' a ni, a ti.

Russian tawng hmang awmna, Transnistria hian Ukraine khawthlang lam a ri a, Soviet Union a kehdarh khan independence an puang a, thisen pawh a chhuak hnem hle a, mahse, khawvela hian an indan dan hi a pawm chhiah lo a, Moldova hnuaiah official tak chuan a awm a ni. 

1995 atanga khan Russian sipai 1,500 velin an thutchilh a, hei hi inremna anga dah an ni. 

Gen Minnekayev, Russia central military district-a deputy commander a thusawi an tih hi Sverslosk-a sipai hunpui-a a sawi a ni a, hemi tum hian Gen Minnekayev chuan, "Ukraine chhim lam thunun hi Transnistria talchhuah theihna tur a ni, Russian tawng hmang te nekchep an nihna hi a chhan pakhat a ni bawk," tiin a sawi a ni. 

Putin chuan February 24-a Ukraine an an run hma khan Russian tawng hmang te chep chu tha an tih loh thu a lo sawi tawh bawk.

Ukraine defence minister chuan Gen Minnekayev a thusawi hi Russian imperialism rilru dik tak a ni, a ti ve bawk.

Ukraine President Volodymyr Zelensky chuan a tih thin anga zan lama thuchah a neiah, "Russia-in Ukraine an runna hi a bul tanna chauh a ni, hemi hnu hian ram dang pawh awp an tum leh ang," tiin a sawi a ni. A hma pawhin Russia hian independent ram ni tawh te chu anmahni lama tanga siam turin awp beh a tum, tiin a lo sawi tawh bawk.