Serbia chuan Russia aiah Davis Cup an khel thei dawn a, Australia pawhin Billie Jean King Cup-ah Russia tel loh zar an zo thei dawn tih International Tennis Federation (ITF) chuan a puang chiang tawh. Russia in Ukraine a run luih vangin Russia leh a thlawptu ram Belarus chu international team competition-ah hian tel an phal sak dawn lo a ni. 2021 khan he competition-ah hian semi-final an thleng phak a, competition-a tel phak lo ram zingah Serbia leh Australia te hi an rank a san ber vangin he competition-ah hian an tel ve thei dawn ta a ni. Slovakia leh Belgium te pawh Billie Jean King Cup final tel tur hian an tling. 

Thla leh khian Slovakia hmeichhe team te chu Australia team nen qualifier khel tur an ni a, mahse vannei ta hlauh a, Belgium hi vannei bawkin an khelh tur Belarus ten an khelh theih loh vangin walkover hmangin chaka puan a ni a, an tlin phah bawk. Kum hmasa lama runner-up Switzerland leh April thla chhunga qualify ten November thlaah final an khel ang. 

Davis Cup-a mipa team bikah hian wild card hmangin Serbia leh Britain an lut a, qualifier a chak ram 12 bakah 2021 finalists Croatia te nen ram 16 ten September thla khian khawpui pali-ah competition hi an khel ang. Heng team zinga a chak team riat chuan knockout stage an lut ang a, tennis mipa calendar a season tawp kharna event chu November thlaah an khel ang. Nikum 2021 Davis Cup leh Billie Jean King Cup-ah khan Russia hi an champion a, kum khat chhunga he competition pahnih-a champion ve ve thei ram palina an ni.