September 4, 2022; Zofate Chhanchhuahna Camping (Zoram pum huap) October ni 17, 2022 atanga tiamchin awm lova Rangvamual a neih turah inbuatsaihna ngawrh takin kalpui zel a ni a, camping a lut tur in report mi thahnemtak an awm tawh. Rawngbawlna nei tur Bethel Ministry chuan an ko a tla rawngbawlna an hlenchhuah ngei theihna turin Zoram mipuite tawngtaipuina an ngen.

ZALEN thudawn danin, camp neihna hmun tur, Rangvamual truck terminal ah camping vawi khat ah mi 1,000 bawr vel len theihna tur hmun leh pandal sak mek a ni a, Central YMA ruahmanna angin, nitin Aizawl khawpui chhung atangin YMA branch 5 zel an thawkchhuak thin. Tun inrinni lo awm tur, October ni 8 hian hnatlangpui neih a ni ang.

Zofate Chhanchhuahna camping neih tur atan hian Sub-Committee 10 din a ni a, committee hrang hrang ah, Central YMA bakah sawrkar lam mi pawimawh thahnemtak an tel.

Camping hi October ni 17 ah tanin, camp lut tura sawmna pawh Aizawl bakah district hrang hrangah kalpui mek a ni a, Central YMA chuan YMA branch tin ten an huamchhung atanga camp lut turte ngaihven turin a ngen bawk.

Camping neih tura rawngbawlna chanvo nei tur 'Bethel Ministry' lam chuan vawiin thlengin camp lut tur mi thahnemtak in report an awm tawh tih ZALEN an hrilh a, tun thlenga in report tawh ah camp lut tur in report upa ber chu kum 60 chuang mi niin, a naupang ber chu kum 3 mi a ni.

Camping ah hian Frederick Laldindika Bethel Ministry chu speaker a ni dawn a, Ministry lam chuan tha taka rawngbawlna an hlen theihna turin Zoram mipuite tawngtaipuina an ngen. Bethel ministry te hian karleh lamah Zofate Chhanchhuahna Camping pualin retreat an nei ang.