ZALEN September 9,2025: FabullaFilms leh Paperdoll Productions te chuan Mizo filmstar hriat hlawh zinga mi Rynzuala leh Vanneitluanga te thawnthu ziah atanga film an siam “TRAP BETWEEN REALMS” chu tihchhuah tumin hma an la mek a, he film trailer hi youtube lamah pawh en theihin a awm tawh.

He film-ah hian amah Rynzuala hi a chang nghal a, mipa naupang dinchhuah tuma harsatna hrang hrang tawk Rinfela angin a chang dawn. He film hi Mizo film chhuak tawh te nena khaikhin chuan a kalphung hi a danglam dawn a, ngaihtuahna fim senga en a ngai ang. Rinfela hian lehkhabu danglam tak a hmuhchhuah atanga a Mumang khawvel atanga talchhuak tura a beihna vel chu he film laimu hi a ni.

Trap Between Realms film changtu te hian Elite Gym-ah Isaac Lalchhuanmawia (National Muaythai gold medalist / fight choreographer) hnuaiah Basic Mix Martial Arts coaching leh fight choreography chu thla hnih ngawt an kal a, a changtunu Angaihi (Lalhruaitluangi) phei hi chuan Mix Martial Arts coaching kal chunzawmin, he infiamna huang hi luhchilh chhoh zel pawh a tum a ni. 

A film hi Dark fantasy film tur ang chi, action, coming of age leh psychological thriller inpawlh kan tih ang chi a ni a, 'Trap Between Realms' ah hian khawvel pahnih ( alternate realities) ang kha kan hmu dawn in a lang. He khawvel chhungah hian eng ang mi nge kan hmuh tur te chu a film trailer leh teaser ah a hmuh theih dawn a ni.