Aizawl: Sa-ah Mizoram a la intodelh lo hle a, tun dinhmunah Mizoram mamawh zaa 65 chu state pawn atanga lakluh a la ni a. AH & Vety department chhut danin Aizawl khawpui ringawtin thla khata vawksa a ei ral chu chawhrualin quintal 12,450 (kg 12,45,000) vel a tling.

ZALEN thudawn danin tuna Mizoram mamawh zaa 65 chu state pawn atanga lakluh a ni a, saa intodelh turin Mizoram sawrkar pawhin ngaihtuahna a seng nasa viau thin.

Hetihlai hian tun hnai kum 10 chhungin Mizoramah vawk natna hri a leng nasa hle a, kum 2013-ah PRRS a len avangin tam tak an thi a, hemi hnu kum 2016, 2018-ah PRRS vang bawkin vawk tam tak an thi leh bawk.

Kum 2021 leh 2022-ah vawk hri tho, African Swine Fever (ASF) vangin Mizoramah vawk tam tak an thi leh a. 1st wave (2021)-ah vawk 12,568 suat (ASF kai) an ni a, 2nd wave (2022)-ah 11,594 suat an ni a. 1st wave-ah vawk 33,417 an thi a, 2nd wave-ah 12,568 an thi leh a. Hetihlai hian ASF hi ‘calamity’-ah pawm a ni lo.

AH & Vety chhut danin tun dinhmuna Aizawl khawpuiin thla khata vawksa a ei ral zat chu qntls. 12,450 vel a tling a. Vawksa  chauh ni lo, saa intodelh tur leh state pawn atanga a tlem thei ang ber lalut turin sawrkarin ruahmanna leh hmalakna a kalpui a, hmasawnna pawh a awm mek zel nia ngaih a ni.