Bengaluru-a SAFF Championship khelh mekah India-in Nepal hnehin semifinal an lut ta a, inkhel zawhah chanchinbumiten Lallianzuala Chhangte te an luh hnua an khel a ziaawm sawt chungchang an zawhnaah Blue Tigers kaihruaitu, Mahesh Gawli chuan a mi malin tumah a fak duh bik lo.

Inrinni zana Sree Kanteerava Stadium-a inkhelah ni thum liam taa Pakistan laka bul tantu pariat ngawt mai awltir niin a ngai pathum chiahin inkhel bul an tan a, a awl zingah khan Mizo tlangval Lza pawh a tel.

Mizo Flash tia an sawi hi minute 63-ah Udanta Singh thlakin a lut ve chauh va, hemi hma lawk hian Sunil Chhetri-a chuan ram tana a goal 91-na thunin India-in Nepal lakah hma an hruai tawh.

Mumbai City FC winger rual hian Jeakson Singh Thounaojam luhtir a ni bawk a, hemi hnuah hian India inkhel a nung sawt tih phah rual a ni lo va, minute 70-ah Naorem Mahesh Singh-a’n an goal hnihna a thun zui ta bawk a. Minute 82-a Rahim Ali dah luh a nih leh hnuah phei chuan Nepal an che zui thei tawh lo tih theih a ni.

Inkhelh zawhah pawh a ruala substitution a siamin a tha zawnga inkhel a nghawng chungchangah hian coach Igor Stimac-a’n Pakistan laka red card a hmuh avanga a aiawha team kaihruaitu, Gawli chu thuthar lakhawmtuten Mizo tlangval leh a ruala lut hming lam chhuakin zawhna an zawt a; mahse, mi malin tumah a fak bik duh lo.

“First half-ah kha chuan Nepal khan khelhna hmun kha min pe miah lo niin ka hria a, an khawng a, an tlarhnung a phui em em bawk a. Second half-ah erawh cool leh hahdam takin ball kan chang a, kan thunun ta thung a. Chhangte (hnam dangin an sawi/koh dan) leh Rahim te leh mi dang tu emaw bik vang a ni lo,” a ti a. “Tlang taka sawi phei chuan, 2-0 in kan sang tawh sa,” a ti.

Coach Gawli hian tumah fak bik lo duh lo mah se inkhel entuten a subsitution siam a fuh an ti a, Mumbai City winger Lza pawh hun nei rei lo mah se a khel tha tawk tih an chiang a. Hun tawp dawnah Chhetri goal ‘khilaitu’ Nepal keeper leh an captain, Kiran Kumar Limbu tan hna a siamsak zauh bawk.

SAFF Championship-ah hian India hian Group A-ah Pakistan leh Nepal an hneh ta a, an dawtah hian vawi hnih chak ve tawh tho, champion tura rinkai, Kuwait an la awm a, Thawhlehni tlaiah an inhmachhawn ang a, group hmahruaitu tihfel a ni ang.

Semifinal-ah hian Group A-a a sang berin Group B (Lebanon, Bangladesh, Maldives leh Bhutan)-a pahnihna a tum ang a. Group A-a pahnihnain Group B-a pakhatna a hmachhawn ve bawk ang.