Aizawl: Zoological Park, Sakawrtuichhun atangin tun hnaiah zawng a chhuak thin nia thudawn a ni a, hemi chingfel tur hian Environment, Forest and Climate Change (EFCC) Department chuan hma a la mek niin Zalen a hrilh. Thudawn danin Aizawl Zoological Park (sahuan), Sakawrtuichhun atang hian tun hnaiah zawng a chhuak thin a, tun hma pawhin a chhuak thin nia thudawn a ni. Hemi chungchangah hian EFCC department hotute chuan Zalen zawhna chhangin zawng an chhuah ngam loh nan hian electric fencing (a hungnaa electric tih kal) tih tum anih thu an sawi. Zawngah pawh a thalai chak tha deuh chuan pal hungna chhuah theih loh tura ngaih chu mak deuh maiin an lawnliam thei a, an lo chhuak leh thin niin an sawi. EFCC hotute chuan an hnathawkte ngun zawka veng turin an hriattir niin an sawi a, a bul hnaia cheng mipuite a tihbuai awm report an la dawn loh thu an sawi. Hetih lai hian tun hnaia sahuan tlawhtu zinga pakhat chuan zawng chhuakte hian a tlawhtute a rawn tibuai thin niin a sawi a, an ei tur kente pawhthlaksakin mipuite seh tum thin bawk niin a sawi. Sahuan hnaiha awm Lungverh YMA hruaitu Lalthanmawia chuan Zalen zawhna chhangin zawng chhuak chu a awm thu leh mipuite a la tihbuai awm an hriat rih loh thu a sawi a. Tun hma chuan zawng chhuak hian a bul hnaia naupang te a seh thin niin a sawi a. Tun hnaia chhuak chuan veng mipuite tana harsatna an la siam loh thu leh mipui chenna hmun a rawn thleng rih lo niin a sawi bawk. Aizawl Zoological Park awmna veng Sakawrtuichhun khawtlang hruaitute chuan sahuana zawng chhuakin mipuiteah harsatna a siam awm an hriat rih loh thu Zalen an hrilh bawk.