Aizawl; Champhai district chhung Saichal khawtlangin sum an thawhkhawm hmanga an rawih, Govt Primary School, Saichal-a zirtirtu pakhat, H Lalhmingmawia (30) s/o Nunkima, Saichal chu a zirlai naupang 32 zet mipat hmeichhiat rawngkaia mawilo taka lo khawih thinah puh a ni a, Champhai district Jail-ah dahluh a ni tawh. Hetih lai hian, a khawih chingpen nia sawi, zirlai naupangte chu Zirtawpni khan Ngopa police leh medical team ten Saichal khuaah kal chilhin an endik. Lalhmingmawia hian a zirlai hmeichhe naupang, primary zirlaite hi mipat hmeichhiat rawngkaiin mawilo takin a lo khawih thin tih hi, Nov. ni 2 zan khan hriat thawi tan a ni. Hemi hnu hian a theih ang anga an ngaihven zui hnu-ah Nov. ni 4 zan khan he school-a zirlai nu leh pate hi inkokhawmin, hmalak dan tur an sawiho a, naupang pahnih chhung te hian police-ah FIR thehlutin, police ten thil awmdan an chhuizui naah H. Lalhmingmawia hian a zirlai naupangte mipat hmeichhiat rawngkaiin mawilo takin a lo khawih thin tih hriat chhuah a ni ta a ni. HLalhmingmawia hian zirlai naupangte hi a chet dan sawichhuak lo turin a vau thin niin sawi a ni a, hei vang hian an sawichhuak ngam ngailo a. Hetihlai hian, tunhnai khan mawilo taka a lo khawih tawh thin hmeichhe naupang thenkhat chuan Zonet Cable TV-a tihchhuah thin, 'Savdhaan India' (India Fights Back) serial film, Mizo tawnga lehlin an en atangin, an chunga thil thleng hi an chhungte bulah an sawichhuak ni a thudawn a ni. Hemi atang hian zirlai naupang nu leh pate chu inkokhawm nghalin, Ngopa Police-ah FIR an thehlut nghal a, H. Lalhmingmawia'n mawilo taka a lo khawih tawh nia hriat hmeichhe naupang 2 te chu Nov. ni 5 khan Ngopa damdawi ina enfiah turin hruai nghal an ni. Thudawn danin, H Lalhmingmawia hi nupui nei lai, fa pawh pathum nei tawh a ni a, kum 2012 atang khan Saichal VC ten ruai tanin, a hlawh tur hi Saichal khawtlangin ni 100 inhlawhna (MGNREGA) an neih atangin an pe thin nia hriat a ni a. Ngopa Police ten man nghalin, thil awmdan an zawtfiah a, Champhaiah hruaiin Champhai district jail-ah dahluh nghal a ni. H. Lalhmingmawia'n a lo khawih hriat hmasak hmeichhe pahnihte hi kum 10 mi leh kum 12 mi an ni a. Hmeichhe naupangten an chhungte an hrilh dan chuan, kum 10 mi hi kar kalta Ningani, Oct. ni 30 khan a khawih a, kum 12 mi, pawl 6 zirlai hi chu kum 2 vel kalta, pawl 4 a zirlaia mawilo taka a lo khawih tawh a ni thung.Pawikhawihtua puh Lalhmingmawia hian a thiltih hi a phalo a, amah hi Kohhrana inhmang tak a nih avangin, a chet dan hi Saichal mipuite pawhin awih har an tih thu an sawi. Saichal khawtlang hruaitute chuan an khawtlangin zirtirtu atana an rawih H. Lalhmingmawia hi an ban nghal nia hriat a ni a. Zirlai naupangte chunga thil thleng chuan an rilru a tihnat thu leh, pawikhawihtu chu a phutawk hremna pek ngei an duh tih an sawi a ni. Saichal Student’s Union chuan thuchhuah siamin H. Lalhmingmawia (32) s/o Nunkima Saichal chu a hna atanga ban tur leh dan ang taka hrem turin thuneitute an phut tih an sawi.