Aizawl: Saiha Horticulture Division hnuaia strawberry chingtute chuan November 2014 atanga tun thlengin strawberry hralhna atangin Rs. 43,10,000 chuang an hmu chhuak tawh. Saiha Horticulture officer CH Lalmuanpuia hnen atanga Zalen palai thudawn danin Saiha atanga km 10-a hla, Niawhtlang-III ah kum 2014 atangin Mission for Integrated Development of Horticulture (MIDH) hnuaiah strawberry (sweet charlie) chin tan a ni a. Strawberry eizawn nana hmang hi chhungkaw 23 chuang an awm tawh a ni. CH Lalmuanpuia chuan kum 2010 ah Niawhtlang-III ah N. Lalsiama huanah strawberry chin chhin a nih thu sawiin, enchhinna chu a hlawhtling hle nia hriat a nih hnu ah Horticulture deparment hmalakna MIDH hnuaiah mi 20 laiin an ching chho tan tih a sawi a. Strawberry chu eizawnna tlak a nih tih hriain huan siam belh an awm zel thu Zalen palai a hrilh. CH Lalmuanpuia chuan strawberry chu hectare 20-a zauah chìn mek a nih thu sawiin, Niawhtlang I, II leh III, Siata, Chakhang, Chapui ah te hectare 60-a zauah hma thar lak an tum niin a sawi bawk. Niawhtlang-III a strawberry ching tu Jonathan-a chuan strawberry an chin tan atangin Rs. 4,96,950 chuang sum an hui tawh thu Zalen palai hrilhin, eizawnna tlak a nih thu a sawi a. An thei thar chhuah te chu Saiha bakah Lawngtlai, Lunglei leh Aizawl-ah te an hralh thin thu a sawi bawk. Horticulture department hmalakna Mizoram hmun hrang hrangah strawberry huan siam belh zel tum a ni a. Kolasib Horticulture Division hnuaiah pawh hmalakna kalpui mek a ni a, Kolasib sik leh sa in a ngeih em tih Horticulture centre ah enchhin mek a ni a. Kolasib Horticulture officer Lalthlamuana chuan enchhinna chu a hlawhtlin chuan kum thar lamah chhungkaw 10 bawr vel thlang chhuakin chin tir ve tum a nih thu a sawi bawk.