ZALEN July 30, 2023: Mizoram Election 2023 atana bial hrang hranga candidate tur puang hmasa ber, Zoram People’s Movement Party (ZPM) chu an candidate thlak tur anga sawi a awm a. Dampa biala ding tur, Vanlalsailova leh Serlui biala ding tura an ruat, Jimmy Laltlanmawia te chu an hriselna dinhmun avangin an thlak dawn niin thuthang a awm mek.

ZPM Secretary General PC Vanlalruata leh an MLA pakhat atanga thudawn danin an candidate pahnihte hi tun dinhmunah thlak tumna a la awm rih loh tih an sawi a. Chutihrualin an candidate pakhat zawk, Serlui biala ding tura an tih, Jimmy Laltlanmawia hian hriselna lamah harsatna a tawk a, dialysis tih a nih hnuah a kal (kidney) thlak a ngai tih hmuchhuah a ni.

Dampa biala ding tur, Vanlalsailova hi a rilphir zai a ni a, a kal chu zai ngai dinhmuna a ding bawk niin thu dawn a ni.

Mahse, thlak tumna a awm rih lo niin ZPM atanga thudawnna chuan ZALEN an hrilh.

Jimmy Laltlanmawia hi kal thlak ngai a nih avangin a dinhmun tur hriat a nih loh thu an sawi a, amah a inhnuhdawh rih loh avangin thlak tum zawnga hmalakna a la awm lo.

Dampa bial atana an candidate Vanlalsailova chu damdawi in chhuahsan thei mai turah an ngai a, harsatna lian nei lova an ngaih thu an sawi a, a bial vil chhunzawm thei turah an ngai.

Dampa bialah hian Vanlalsailova hian MLA ni lai, Lalrintluanga Sailo, MNF chu a khing tura ngaih a ni a. Serlui bial hi MNF bial bawk niin Lalrinsanga Ralte chu bialtu MLA ni a ni a. Congress leh BJP chuan he bialah hian candidate tur tih chian an la nei rih lo.