Mizo zinga zaithiam lar ber tih ngam Vanlalsailova chuan naktuk January 25 hian Dawrpui Presbyterian Biak Inah nupui a nei dawn a, inneih ceremony hi LPS-ah live-a pekchhuah a ni ang - Mizorama hetiang thil a thlen vawi khatna tur a ni hial mai thei! LPS 1-ah an live dawn bakah hian YouTube lamah pawh live-a pek chhuah a ni dawn bawk. 

West Phaileng tlangval Vanlalsailova hian nupui atan Lunglei Chanmari nula Cindy B. Lalrinfeli a nei dawn a, naktuk chawhnu dar 12:30 ah an inkutsuih dawn a ni. An inneihna hmun tur hi Mizorama mihring len tam theihna ber Biak In nia sawi Dawrpui Presbyterian Biak In a ni dawn a, tel pawh an thahnem khawp ang le. 

An inneih ceremony hi Mizoram pawn atang pawha en theih turin Cable TV leh YouTube-ah live a ni dawn a, hmun hrang hranga Zohnahthlak tan chanchin lawmawm tak a ni ngei ang. A hmuna tel ve remchang lo tan pawh awm hmun atangin a lo thlir theih dawn a, a nuam dangdai viau dawn a ni. 

YouTube bikah chuan Vanlalsailova official YouTube channel-ah inneih inkhawm hi live a pek chhuah a ni ang. LPS-in an live dawn avang hian Mizo milar inneih inkhawm live-a Cable TV-in an pekchhuah hmasak ber tur a ni nghal dawn bawk.