ZALEN October 11, 2023 : Vawiin khan ZPM chuan West Phaileng Dinthar kawnah vantlang inkhawm leh mithar lawmluhna an nei a, ZPM Leader Lalduhoma leh Dampa biala ZPM Candidate Vanlalsailova ten thu an sawi a. Vanlalsailova chuan ram leh hnam tana tha tur ngaihtuahin Pathian rawn chungin mi zawng zawng vote thlak turin a ngen.

Dampa Constituency ZPM official candidate Vanlalsailova chuan thu sawiin, "Politics hi ngaihven lo mah ila, politics hian mitin hi min ngaihven tho tho a, kan nitin khawsak phung thununtu anih avangin kan ngaihtuahnate seng a, kan ram leh hnam, khawtlang tana tha ber tur ngaihtuahin Pathian rawn chungin mi zawng zawng vote thlak turin kan in ngen a ni,” a ti.

Sailova chuan an bial leh ZPM chungchang sawiin, "ZPM hian Chief Ministerial candidate tha tak mai kan nei a, ram leh hnam tana a beihna leh a chan tawh te a nasain ram tana a inpekna te hi a sang em em a ni. Dampa bial hian hmasawnna tur kan ngah hle mai a, ei leh bar chu sawi loh, kan in kalpawhna kawng te hi a tla bal em em mai a ni. Pathian zara kan lo sawrkar a nih chuan kawng siamthat hi hna hmasaah kan nei dawn a ni," a ti.

He huna party a mi thar lawmluttu ZPM Leader Lalduhoma chuan MNF leh BJP chungchang sawi langin, "Kan rama Pathian ram a lo thlen theihna tura daltu lian tak chu NDA leh a sangawi zawnpuite an ni. Kan ramah hian BJP te hi a party ang chuan an hlauhawm tham lo a, mahse NDA zawmtu MNF te hian ram leh hnam pawi an sawi a, an tih loh tawp tur an ti a ni. Heng kan ram tana pawisawitute hi kan chhuahsan a ngai a ni," a ti.

Lalduhoma chuan party mipui te hriat tur sawiin, "ZPM te hi keimahniah Pathian ram a thleng tur a ni a, leia Pathian ram a thlen theihna turin kan mimal nun kan fimkhur a ngai a, kan danglam ngam tur a ni. Kan ram leh hnam khai chhuaktu tur kan nih avangin kan thawhrim a ngai a, Sem ni lovin thawhrimna hmangin kan ram i siam ang u," a ti bawk.