Aizawl: Nikum atanga din tan Sainik School, Chhingchhip chuan kumin hian pawl 6 zirlai admit thar zingah hmeichhia 6 an admit tel a, hei hi India ram puma a vawi khatna a ni. Sainik Welfare and Resettlement hotute chuan ZALEN zawhna chhangin Sainik school-ah hian nikumah pawl 6 an hawng a. Hetah hian mipa vek mi 60 admit an ni a. Kumin pawl 6 admit tharah ve thung chuan zirlai 60-ah hmeichhia 6 admit an ni a, India rama Sainik School 27 zinga hmeichhia admit hmasa ber an ni ta a ni. Sainik School ah hian Principal leh Vice Principal-ah hian Army, Air Force leh Navy-a service lai an intan chhawk dawn a. A bak hi chu trained leh qualified teacher-in an zirtir a ni. Zirlaite hi hostel-ah awm vekin army, airforce leh navy a la service tur hisapa enkawl an nih thu leh discipline hnuaiah tha taka enkawl an nih thu Sainik hotute chuan ZALEN an hrilh. Sainik School a pawl 6 admit tharte hian June 4 khan class an tan a. Nikuma pawl 6 admit-ho kha kuminah pawl 7 ni chiahin tunah hian zirlai hi pawl 6 leh pawl 7 zirlai 60 ve ve awmin 120 an awm mek a ni. Sainik School-ah hian state pawn atangin zirlai lo kal 3 an awm mek bawk.