Aizawl: Mizoram Pradesh Youth Congress Committee (MPYCC) chuan nimin khan an president Vanlalawmpuii Chawngthu hovin Sainik School, Chhingchhip an tlawh. Sainik School Chhingchhipa lut tur hian Class VI naupang tur tan January ni 15, 2017 khan Entrance exam neiin mi 180 an tling a. February ah Medical exam lehin March thla chhungin written exam an nei anga zirlai 60 thlan an ni ang. Class hi April thla atanga tan tum a ni a. Bungraw mamawh lei nan Defense Ministry atangin Rs crore 1.85 kumin atan an dawnga kum tin Rs crore 1 an dawng ziah ang. Congress Thalai President chuan,  "Kan state thenawm Manipur-in Sainik School an neih avangin Sipai Officer tam tak an chherchhuak a, Congress sawrkar hmasa ah khan khatih hun laia Chief Minister Lal Thanhawla chuan Sainik School din a nih theih ngei theih nan nasa takin hma a la a, July 1997 khan Sainik School din ngei a nih theih nan ruahmanna a siam tan a. Congress-in Mizorama sawrkarna a chan leh tak hnu khan sawrkar chuan Sainik School nei thei ngei turin chak takin hma a la chho nghal a,  Ministry of Defense atangin approval pek niin Ministry of DoNER chuan Establishment of Sainik School at Chhingchhip in Mizoram, Serchhip District, project Rs. 82.89 crore chu NLCPR, FY 2010-2011 khan pawm a ni ta a. 13th Finance Commission chuan Project atan hian Crore 50 a rawn pe leh a. Hemi hnuah hian DPR chu Rs. 100.64 crore-a siam a ni ta a ni," tiin a sawi.