October 18, 2023; Nimin zing lam khan Vairengte Police Station hnuaia Saiphai leh Phaisen Police Outpost duty te chuan Sapzu case 100 zet an man a, a neitu a puh mi pahnih te chu nimin tlai khan Kolasib District Court ah hruai annih hnu in District Jail ah dah luh nghal an ni.

Saiphai Police Outpost a duty te chuan nimin zing khan Shillong leh Aizawl inkara Sumo service pakhat, Aizawl pana tlan atangin Sap zu Royal Stag case 4 leh Officer's Choice Case 1 (Case 5) leh a neitu a puh Biakthantluangi (35) d/o Biakthansanga Hlondo (L), Aizawl Ramthar Veng ni a in chhal an man a, Vairengte P/S ah thubuai ziah luh a ni.

Hetihlai hian nimin zing lam vek khan Phaisen Police Outpost a duty te chuan Sap zu- McDowell's Whisky case 45 leh McDonald's Rum (plastic) case 50 (a vaiin case 95) leh a neitu a puh hnamdang driver Ali Hussein Bharbhuyia (30) s/o Abdul Mukid Bharbhuyia, Panchgram, Hailakandi District, Assam an man a, ani pawh hi Vairengte Police Station ah thubuai siam sak a ni.

Phaisen Police Outpost a duty ten an man Zu phurhna lirthei hi Ashok Leyland niin, Registration No. AS- 26C/9421 a ni a, Driver Ali Hussein Bharbhuyia hian Zu hi Sairang khaw pelh, Aizawl luh hma hmun pakhata dah tur niin a sawi. Lirthei hian nitin eichawp bungrua chi hrang hrang a phur a, chumi kar ah chuan Zu case 95 zet hi a phur a ni