ZALEN April 5, 2026: Mizoram chhung Saipum rama Assam miten buh tin 70 atanga 80 inkar vela zau ram an vah chu tun thlengin kut thlak chhunzawmna a awm lo nia thudawn a ni.

Saipum khawtlang hruaitute hnen atanga ZALEN thudawn danin tun hnaia Assam lam mi thenkhatin Saipum ram chhunga lo an vahah hian vawiin thlengin kutthlak zuina hnuhma a awm lo a, lo an vah hi hal a nih loh bakah Assam lam mite chet zuina pawh a awm lo.

Tun hnaiah social media-ah Assam lam mi thenkhatin Saipum ram chhungah lo an vat nia thehdarh a ni a, hei vang hian Kolasib DC leh SP te chuan March 12, 2026 khan Saipum khua tlawhin khawtlang hruaitute nen thil awm dan an sawiho.

Saipum khawtlang hruaitute chuan hnam dangten ram an vahna hmun chu a hma chuan Mizoram police-te duty-na thin, Chawilung Camp awmna hmun a nih thu an sawi a, kawng chhiat vanga Mizoram police duty an awm loh hnuah venhimna a chak lo a, chu chu Assam lamin remchangah lain an rawn zuam ta nia an ngaih thu an sawi.

Saipum khawtlang hruaitute chuan Assam lamin ram an vahna lai chu Saipum ram ngei a nih thu an sawi a. Assam lam atanga hmalakna a kal tlang zel a nih chuan nakin zelah ramri buaina lian zawk a chhuah theih dawn thu sawiin, a hma thei ang bera hma la turin sawrkara thuneitute an ngen.