ZALEN March 12, 2026: Tunhnaia Assam lam mi thenkhatin Saipum ram chhunga lo vat a, hma an la nia thehdarh a nih chungchang bawhzuiin, nimin khan Kolasib Bawrhsap Robert C. Lalhmangaiha leh Senior SP Lalrinpuia Varte te chuan Saipum khua tlawhin, he harsatna thleng chungchangah hian Saipum khawtlang hruaitute nen thil awmdan an sawiho.

Saipum khawtlang hruaitute chuan Kolasib DC leh SP te hi thil thlen dan tlangpui lo hrilh, hnam dang ten lo vah nana hmun an rawn ruahman hi a hma chuan Mizoram sawrkar hnuaia Police te duty-na thin, Chawilung Camp awmna hmun a nih thu an sawi a. Kawng chhiat avanga he hmuna Police duty te an awm theih tak loh hnuah, venhimna hna a lo chak tawk ta lo chu remchangah lain Assam lam atang hian an rawn zuam ta niin an ngaih thu an sawi bawk.

Kolasib Bawrhsap chuan he thil thleng hi Sawrkar pawhin a ngaipawimawh hle tih sawiin, buaina leh inepna chhuak lova boruak muanawm tak hnuaia chinfel a nih theih dan kawng zawn chu thil tul hmasa a nih thu a sawi a. A tul ang zela hma la turin sorkar a inhuam thu khawtlang hruaitute hi a hrilh nghal a ni.

Saipum khawtlang hruaitute chuan he hmun hi an pual ram, Saipum ram ngei a nih thu an sawi a, Assam lam atanga he hmalakna hi an kalpui tlang zel a nih chuan nakin zelah ramri buaina hlawm lian zawk a chhuah theih dawn thu an thlen a. Sawrkar chu a hma thei ang bera hma la turin an ngen a, remna leh muanna nena he harsatna chinfel a nih theih dan tur kawng hrang hrang an sawiho nghal bawk a ni.