ZALEN August 19, 2026: Impact Study Committee on KMMTTP and Railway Link between Bairabi and Sairang-te chuan Chief Minister Lalduhoma hnenah an thil zir chianna Final Draft Report an thehlut.

Chief Minister hian Impact Study Committee-te chu lawmthu hrilhin, thla 12 chhunga report thehlut tura tih in nih laiin thla 10-ah an rawn inpeih thei chuan an thawkrim tih a chian thu a hrilh. Bawhzui ngaite sawrkarin a bawhzuina kawngah study team-te thawhpuina hi an mamawh zui zel dawn a ni, tiin lawmthu a lo hrilh a, sawrkar an thawhpui zel a tul thu a hrilh.

Report tlangpui (Situational Analysis and Field Study) sawihona neiin Mizoramin Rel service a neih hnua a nghawng (impact) an zirnaah ILP tha taka kenkawh a tul thu an tarlang a. Mizoram chhunga rel kawngin a paltlang khuaten hlawk zawka rel an chhawr theih nan rel station tin te approach road tha neih a tul an ti bawk. Sairang leh Aizawl inkar Taxi chuan man to lutuk avanga mi tam takin rel an chhawr tangkai tawk loh thu pawh an sawi a ni.

Study Committee-te hian Arunachal Pradesh, Nagaland leh West Bengal te an tlawh a. Nagaland an kalnaah phei chuan thla rei lote relin Mizoram a tlawh hnua Impact Study Team Mizoram sorkarin din nachang a hria chu entawntlak an tih thu an lo hrilh a ni.

Mizoram leh Myanmar border-a insumdawn tawnna kal dan leh kal zel dan tur nia lang te, Mizoram sawrkarin a lo hlawkpui ve theih nana dan anga chhiah lak dan kalpui dan turte leh Mizoram tharchhuah ram danga hlawk zawka thawn chhuah dan turte an sawi a. 

Tunah pawh hian Mizorama sumdawngte leh lirtheia eizawng (logistic service) ten an hlawkpui a, Mizo sumdawngte hian Zakhai tawng emaw Kawl tawng an hman theih phei chuan tun aiin an hlawkpui lehzual ngei ang, an ti. Khawtlang himna leh dan zawm kawngah mipuite inzirtir uar a tul hle niin an tarlang bawk. 

KMMTTP chu kum 2027-a hawn a nih dawn chuan chak taka hmalakna tur a tam hle niin an ngai a. Tuna Zochachhuah leh Salachhuaha sumdawngten an mamawh an sawi tam ber chu Godown a ni a. Zokhawthar lama mite sawi langsar ber chu Indo - Myanmar - Thailand Corridor tihhlawhtlin a ni, an ti.

Study Committee hi an Chairman T. Lalhlimpuia, MLA chuan a ho va, Zomuana, Member Secretary leh member dangte an tel a. Report kimchang hi a buin an siam a, an zirchianna tinah rawtna an siam zel a, a taka bawhzui kawngah pawh sawrkar an thawhpui zui zel dawn a ni.