ZALEN March 2, 2026 : Mizoram Pradesh Congress Committee chuan vawiin khan Political Session an nei a, he hunah hian MPCC President Lal Thanzara chuan thu sawi in, "Ni 23 Febuary 2026 Monday a Chief Minister-in Assembly House session-ah 'Sairang rel station-ah bazar nî siam tum a ni' tih a sawi hi thalo hle-a a hriat thu a sawi.

Lal Thanzara chuan, "Bazar nî siam a nih chuan 'vai sumdawnna nî' kan siam dawn tihna a ni a. Mizoram pawisa luanralna nî a ni bawk ang. Mizo chawhmeh lei turin vai an lokal khawm dawn lo va, chawhmeh leh bungrua, thawmhnaw zawrh tur an rawn keng lut teuh dawn a. Sumdawnna a min chimralna tur kawng pakhat a ni thei bawk. Mizo sumdawngte tan a tha lo a, mahni thlai thar zuartute tan a tha lo bawk. Sawrkar hian ngaihtuah nawn se, Sairang Rel station a bazar nî siam hi ti lul suh se," a ti.

MPCC President chuan, "'The Mizo Marriage and Inheritance of Property (Amendment) Bill, 2026' Mizoram Assembly House ah ni 24 Febuary 2026 (Tuesday) a passed taka Bill pu luttu Chief Minister in 'Mizo hmeichhiain hnamdang pasal an neih chuan Mizo an nihna a tawp nghal' tia a sawi hian Mizo mipui tam tak thinlung a tinâ a."

"Nasa taka social media-ah te dodalna a lan tak avanga ni hnih hnu lekah CM vekin 'Sawrkar tih a ni lo' ti a, NGO te pressure avanga bill pulut a nih thu a sawi ta daih hi mawhphurhna lak ngamloh vang a ni. CM bill put luh, House a passed aia sawrkar tih thil dang a awm thei lo. Chief Minister in a hmalaknaah hian midang dem tur zawng lovin mawh la ngam rawh se," a ti.

Lal Thanzara chuan, "Hnam hi thisen avanga kan neih a ni a. India constitution in a tihdanglam theih a ni lo. Mizo Hmeichhia-in mi tu pawh pasalah neiin khawi hmunah pawh, state dang leh ram pawnah pawh awm se Mizo a ni reng ang. Mizo danah Mizo hmeichhiain pasalte hnam an tawm ngai lo," a ti bawk.