ZALEN Nov. 28, 2022 : Centre for Environment & Social Justice (CESJ) chuan Sairang thleng bak rel luh an duh lo tih sawiin, rel chawlhhmun Sairang leh a chhehvel chu Dimapur of Mizoram a ni der tawh tih an sawi.

Vawiin chhun a Aizawl Press Club a thuthar thehdarhtute an kawmnaah he thu hi sawiin CESJ hruaitute chuan, Mizoram tlangram ecosystem derdep takah tuihna leh tui tawmbuk tichhe thei engmah ruahman tawh rih lo se an duh tih sawiin, "Kan ram dung lam paltlang Sairang-Hmawngbuchhuah thleng rel kawng laih tura ruahmanna awm mek hi laih a la ni lo bawk a, kan hneh dawn emaw, dawn lo emaw kan tu leh fa, thangthar chhuan lo la awm zel turte tan, an chhenna tur lo humhalh hi kan mawhphurhna a nih avangin kan dodal zel dawn a ni," an ti.

CESJ hruaitute chuan Meghalaya chuan rel in a ken tel Hindu leh Muslim vangin an state a rel luh an phal lo bur tih sawi bawkin, Nagaland pawhin an rama rel luh an duh tawh loh thu leh Dimapur atangin an inzir fing tawh a, Dimapur chu vairampur a ni tawh mai tih an sawi.

"Hmanni lawkah rel a rawn lut a, rel chawlhhmun Sairang leh a chhehvel chu Dimapur of Mizoram tih a ni der tawh," tiin an sawi bawk.

#ZalenNews