Aizawl; Nimin khan Aizawla chanchinbumi thenkhat ten Urban Development & Poverty Alleviation Department in Sairang-a mitthi/ruang halralna tur an siam mek an tlawh. UD&PA Department chuan kum 2013-2014 chhunga SPA sum an hmuh Rs. nuai 100 hmangin ruang halna hmun (crematorium) buatsaih hna hi an thawk mek a, tunah hian a hmunhma panna tur kawng (approach road) siam hna thawh mek a ni a, hemi zawh hian a halna hmun siam hna hi thawh chhunzawm a ni dawn a ni. UD&PA Department chuan Mizoram ah mitthi halna hmun mumal a awmloh vangin inhal duh ten harsatna an tawk thin tih an sawi a, hemi avang hian inhalna hmun hi sawrkar chuan a buatsaih ta niin an sawi bawk. Press mite hian Sairang a ruang halna hmun bakah Lawipu leh Rangvamual a mirethei chenna tur in sak mek an tlawh bawk a. Lawipu a mirethei chenna in sak mek hi Rs. nuai 3403.43 senna tur a niin a sak hna hi Hindustan Prefab Ltd. in an thawk mek a. He project kaltlang hian mirethei chhungkaw 408 chenna tur in sak a ni dawn a, hei bakah hian community centre, livelihhod centre, water supply, electrification leh a hungna te siam a ni a. Chak taka hna thawh mek a niin March, 2015 ah zawhfel beisei a ni. UD&PA Department chuan mirethei chenna tur hi Edenthar leh Durtlang ah te an sa bawk. } Mirethei chenna tur in hi Rs. nuai 3075.14 senna tur a ni. Chhungkaw 368 cheng thei tura ruahman a ni. March, 2015 ah zawh tum a ni bawk.