ZALEN August 28, 2026: Saitual Joint Village Council buatsaihin vawiin khan Govt. Saitual College Auditorium-ah, Saitual chhul chhuak Rajya Sabha MP atana thlan tlin tak K. Laltluangkima chawimawi a ni a, he hun hi Prof. Lalnilawma, Minister, Tawi bialtu MLA ni bawk chuan a hmanpui.

Rajya Sabha MP K. Laltluangkima chuan Saitual mipuiten amah lawmpuina leh chawimawina hun tha siamsak a, thilpek tam tak an pek avangin lawmthu a sawi a. Saituala piang a nih thu sawiin, a nu leh a pa te pawh Saituala piang leh seilian an ni, a ti a, Saitual chu a khaw ngainat leh sawi fo thin a nih thu a sawi.

K. Laltluangkima chuan Mizoram aiawh MP a nih dawn avangin a mawhphurhna a sang hle dawn tih a sawi a, Saitual mipuite chu tawngtaipui thin turin a ngen a. Rajya Sabha MP chuan beisei neih chu a thiang a, chutih rualin a hlawhtlinna kawngah erawh hriatthiamna sang tak nei turin mipuite chu a ngen a, Saitual hmasawn zelna turin a duhsakna a hlan nghal a ni.

Bialtu Minister Prof. Lalnilawma pawhin, K. Laltluangkima chuan Rajya Sabha MP-a thlan tlin ni turin harsatna tam tak a paltlang thu a sawi a, he chawimawina dawn hi a phu a ni, a ti. Minister chuan K. Laltluangkima chawimawina hun buatsaihtute chu fakawm a tih thu sawiin, inlawmpuina leh chawimawinaa duh tawk mai lo a tawngtainaa hre reng thin turin kalkhawmte chu a chah a ni.

June 8, 2026-a Rajya Sabha MP atana ZPM candidate thlan tlin, K. Laltluangkima hi Saitual chhul chhuak, kum 1965-a Saitual a piang, rambuai avang a Saitual chhuahsan an ni.