ZALEN February 17, 2026 : Vawiin chawhma dar 11 khan Srinivas Sadi, DC & Chairperson, District Convergence Committee kaihhruainain DC Conference Room-ah meeting neih niin Kum 2026-2027FY atana MGNREGS leh Sawrkar Scheme dangte atanga District Convergence Plan awm theite an sawiho.

Bawrhsap chuan line department ten plan an siamte chu a tak chang thei ngei siam tur leh ṭangkai taka hman zui theih nise a duhthu a sawi a, line department-te nena tha taka thawhho zel a duh thu leh a inhawn reng thu sawiin line department hotute thawhrimna chu District, State leh ram tana hlawkna a ni dawn a ni, a ti bawk.

V Laldinsanga, PD pawhin thusawiin kum kaltaa convergence work thawhte leh hmalakna hrang hrangte report a pe a, line department te chu Permissible Work-te hrechiang a Annual Action Plan mila proposal-te siam thin turin a chah a, Convergence Plan siam chungchangah thehnemngai taka thawk a, pheikhai rual taka chet la tlang turin a ngen bawk.

Meeting chuan Convergence Plan chu DRDO Office ah March Ni 12 aia tlai lovah thehluh theuh nise, chungte chu DRDO Office lamten a tul angin an lo bawhzui se tiin an rel.

Meeting-ah hian Srinivas Sadi, IAS, Deputy Commissioner, V.Laldinsanga,PD, DRDO, PJ Lalhmahruaia, BDO, Phullen te bakah District Convergence Committee-te an tel kim hle.