Pathianni zan khan Arsenal-in English champion ni tura rahbi pawimawh an rap pial a, forward Bukayo Saka-a’n penalty a hlah a, West Ham United nen 2-2 in an inhnehtawk.

English winger penalty hlah hi ‘ta se’ tia chhui dawn zui phei chuan a uiawm zual ngei ang a, chhuih lut ta se 3-1 a hma hruai thei kha an ni a, nomawi an la phak lo zui ta hlauh a nih phei chuan a uiawm zual tawlh tawlh mai thei.

Saka hian an London thenawm lakah penalty hlah mah se manager Mikel Arteta chuan a la pettir zel dawn tih a sawi thung.

Arteta chuan, “Kan penalty hmuh pettu a ni zui zel dawn. A pet dawn lo a nih chuan khelmualah lutin keimah ngeiin pet ngei turin ball-in ka vawm ang,” a ti hmiah.

Saka hian Hammers laka penalty a hlah hma hian Wembley Stadium-a Euro 2020 final-ah Italy nen penalty peta chak zawk an zawnnaah a lo hlah tawh a, hemi tum phei hi chuan mi hang a nihna nen, English fan-te deu leh sawihnawmna a tawng zui nasa hle a nih kha.

Arsenal hian kum 2004 hnua a vawi khat nan Premier League champion nih leh an tum mek a, beisei pawh an nei sang. Hetih lai hian tun thlengin hma hruaitu ni mah se an ‘champion loh leh hram’ ringtu an tam hle.

Ni e, rin an hlawh lo pawh hi a âwm lo lo. Tun hnaia league inkhel vawi hnihah si hnih faia hma an hruai hnuah an insuttir ve ve a, West Ham hmain Liverpool nen 2-2 bawkin an inhnehtawk tawh bawk a. An hnuaia miin an hnaih zel.

Khelh khata khel tam chungin Manchester City lakah point liin hma an la hruai mek a, khelh sarih chiah a awm tawh a, Zirtawpni zanah league mawngphaha awm, Southamton nen an inkhel ang.