ZALEN October 3, 2023 : MPCC President Lalsawta chuan India ram a zalén atanga vawiin thlenga BJP vanga hun khir leh thim kan hmachhawn hun hi a la awm ngai lo a ti a, tunah chuan thil dang pawh an ngaihtuah hman tawh lo a, India rama sakhaw zalenna a awm zel theihna tur chu an buaipui ber a nih loh theih loh thu a sawi.

Lalsawta chuan, "BJP hian Sakhaw til bik neiin sakhaw dang vuantute min nekchép cho měk zel a, term hnih an Sawrkar tawh hnu hian term khat dang han sawrkar lehh ngat phei se chuan India ram hi kan chhe dark vek ang tih kan hlau a ni," a ti.

BJP sawrkar chhungin dan hlauhawm tak tak an siam tawh tiin, "MP an ngah avangin Dan (Law) hlauhawm tak tak an siam tawh a- (1) Citizenship (Amendment) Act, 2019 (CAA, 2019) leh (2) Forests (Conservation)(Amendment) Act, 2023 (FCAA, 2023), Kan nun leh sakhua inzawm datna nuaibo turin Uniform Civil Code (UCC) chu 'pass' leh an la tum mek bawk a ni," a ti.

MPCC President chuan, "BJP sawrkar hmalákna hi India ram tán a hlauhawm tih hriain Party 26 chu intelkhawmin I-N-D-1-A (Alliance) an din a, I-N-D-1-A (Alliance) hian Votes vbc. 65 an nei tling a, BJP hian Votes vbc. 23 chauh an nei a ni. Party intelkhawm te hian Central-ah sawrkarna an chang ngei dawnin a hriat a. Mizorama Congress Party-in sawrkarna kan neih chuan MP pawh kan thawh ve thei ang. Sakhaw zalénna kan neih zui zél theih nan leh hêng Dán hlauhawm te sút vek thei túr Congress Party hi India ramah kan sawrkar a ngai a ni," a ti bawk.

Sakhaw zalénna vanga Missionary te'n harsatna táwk lutuk lova an awm theih thin chu túnah chuan an chép ta ém ém a, Foreign Contribution (Regulation) Act hnuaia ram dang atanga tanpuina dawng thin te pawhin harsatna namén lo an táwk, a ti bawk.

Lalsawta chuan, "ZPM hian keini Congress Party angin I-N-D-I-A (Alliance) hi an thawhpui thei lova, BJP erawh chu MNF ang bawkin inthlahrung tak leh Mizoram mipui mitmei veng chungin an thawhpui thei mahna. Chuvangin kan hnam, kan ram, kan sakhaw humhim turin Mizoram mipui hian BJP thawhpui ngai lo túr Congress Party hi kan thlan tlina ngai a ni," a ti bawk.