ZALEN October 24, 2023 : MPCC President Lalsawta chuan Mihring te hi sal leh nawhchi zuar anga pawisaa lei turin Pathianin min siam lo. Pathianin duh taka a din leh a siam kan ni a, Lal Isua thisen chauha lei kan ni, a ti.

Lungdai Bazar-a vantlang inkhawma thu a sawi naah Lalsawta chuan, "Tun inthlanah a hmaa hausa nia kan hriat loh, lo hausa ta viau ten sum an ui lo hle. Suma lei theih sal neih hunlai a liam tawh a. Mihringte hi Pathianin duh taka a din leh a siam kan ni a, suma lei theih kan ni lo. Lal Isua thisen chauha lei kan ni. Kan duhthlanna pawh min zah sak lo, sum hmanga hmusit taka min lei tumtute hi ro min rel sak turin kan thlang ang maw? Nangmah zah lo leh hmusittu hian i zah bik a phu lo, nangmah kalsan turin ti la, kan ram hmelma i ni, kan ram hmalam tichhetu tur hian kan thlang thei lo che, lo ti rawh u, a ti bawk.

Lalsawta chuan sum nei te chauhin kan ram rorelna In pui Legislative Assembly an luah loh a, mi dik leh mi tha te'n an retheih vanga ram rorelnaa an tel ve theih lohna hi Congress party chuan kan thiat mek a, hma kan la zel dawn. Kan ram siam tura kan rin chhan chu Pathian a ni a, kan lama tang Pathian kan nei. Dik tak leh huai taka rorel turin min duh, a duh dana kan tih hian min tanpui ang tih pawh kan ring a, kan zam lo, a ti.

Lalsawta chuan, Pathian Kohhran-te pawhin MPF kaltlangin inthlan fel fai leh tha nei turin hma a la a. An thuawih turin Congress, MNF leh ZPM te min ngen. Chuvangin, MPF in Flag leh Banner te thlenga an duh ang pelin kan kal thiang lo. Election Commission leh MPF pawhin sum nasa taka sen loh an duh. MPF leh Election Commission duh dan ang pela Banner leh Poster a awm a nih chuan dah bo turin ka ngen che u a ni. MPF thu angin tumah phurrit in siam lovin, ram i siam ang u. Engmah therhlo leh inpek tur kan nei lo, mahse ram rorelna tha kan tiam a che u, a ti.

Lalsawta chuan, He ni 15 chhung hian innawmsakna turin in la ngah dawn chuang lo. Inthlan avanga sum luang chiam chiam tura ngaitute hi ram hmangaihtute an ni ngai lo. Chutiang chuan min kalsan thin. Rilru puthmang dik lo te hi ui chi pawh an ni lo.