Aizawl September 4, 2024 : MNF Party chuan Samagra zirtirtuten thla 3 lai mai hlawh an la thei lo chu pawi an ti a. Zirtirtu rim taka zirtir hnathawkten hei chen chen an thawhhlawh an la thei lo leh, Teachers Day hial boycott an tum hi a pawiin a lungchhiatthlak an ti.

MNF chuan, "Hetiang harsatna a thlen chhan hi Mizoram sawrkarin a tih tur a tih loh vang a ni tih hi kan puang a. Education Minister zahawm takin thla 5 chhung Central-in kan sum dawn tur min pek loh vang tih a sawi hi a dik a. Thla 5 chhung Central-in kan sum dawn tur min pek loh chhan hi Mizoram sawrkar-in a tih ve tur thla 5 chhung a tih loh vang a ni."

"Mizoram sawrkar-in Teachers Education Allocation leh thil dang tul tih tur ang a tih fel har avangin zirtirtute hian hlawh la thei lo a ni. Sawrkar inthlahdah vang leh dapchawp lutuka an kal vang liau liaua zirtirtute tawrhna lo thleng hi a pawi kan ti hle," an ti.

"Education Minister hian mawhpuh tur zawng buai lo hian, a inthlahdah vang leh a hna a tlin loh vang a ni tih hi pawm se la, rang taka Samagra zirtirtuten hlawh an lak theih nan hma la nghal rawh se."

ZPM sawrkar hian harsatna a awm hlek a sawrkar hmasa emaw tute emaw puhmawh tur an zawng ruai thin hi a pawi a. Hetiang sawrkar mawhphurhna la ngam lo, insawithiamna tur leh puhmawh tur ringawt zawng kan hrawn hi a vanduaithlak hle a ni," an ti bawk.