ZALEN July 17, 2026: Samthang, Champhai District-a zikhlûm chingtu Samthang Farmer Association chuan vawiin khan Thutak Nunpuitu Team (TNT), Zuangtui leh Operation Kingdom Ministry (OKM), Phunchawng-te ei turin an zikhlûm thar bag 44 (Kg 2,500 vel) an hlan.

Samthang Farmer Association President Lalramsiama sawi danin, heng zikhlûmte hi khawtlangin phur takin nimin khan TNT leh OKM-a pek tur liau liauvin an la a, nizan khan Aizawl rawn phurh thlak nghal a ni a. Samthang Farmer Association hruaitute hi Samthang Welfare Committee, Aizawl hruaitu ten an lo ṭawiawm a ni.

Kumin hian Samthang khuaah chhungkaw 101-in eizawnna atan zikhlûm hi an ching a. Samthang Farmer Association chuan May thla tir aṭa ng khan zikhlûm hi an thar ṭan tih sawiin, Thawhṭanni leh Ningani-ah Mizoram hmun hrang hrangah an hralh chhuak ṭhin a. Kumin hian quintal 1200 vel hralh chhuak tawhin, Rs. 30,00,000 (nuai 30) vel sum an lalut tawh a, quintal 1000 vel hralh tur an la neih an in beisei a ni. Samthang Farmer Association zikhlûm chingtute hi Horticulture Minister C. Lalsawivunga'n Rs.15,000/- a pek bakah bialtu MLA Pu Ramthanmawia'n Rs. 50,000/- in a ṭanpui bawka an chungah an lawm hle tih an sawi.

Samthang khua hi fûr zikhlûm chingtute zingah hlawhtling pawl an ni a, 2005 aṭang khan kumtin fûr zikhlûm hi an lo ching tawh a ni. Mizoram hmun hrang hrangah an zikhlûm tharte hi an hralh chhuah mek zel a ni.