Aizawl March 30, 2023: Vawiin khan Sports & Youth Services Minister Robert Romawia Royte chuan Govt. Aizawl North College (GANC) College Week kharna a hmanpui naah lehkhazir piah lamah insawizawi a pawimawh thu a sawi a, social media lamah fimkhur tur leh hmang sual lo turin zirlai naupang te a chah. 

Khuallian chuan lehkha zir piah lamah rilru hrisel nan taksa sawizawi a tul thu a sawi a, Infiamna chu mihring nuna bet tlat, sawrkar pawhin a ngaih pawimawh a ni tiin, zirna atan pawh a pawimawh a ni, a ti a. Zirna leh infiamna chu inkungkaih tlat a ni tiin. “Mizote chu hnam hrisel leh fit kan nih theihnan Mizoram sawrkarin hma a la mek a, taksa leh rilru a fit a, hnam zahawm kan nih theihna turin mimal, chhungkua, khawtlang leh sawrkar kan tan ho a tul a ni” a ti.

Robert Romawia Royte chuan tunlai khawvelah thudik leh dik tawklo thliar thiam a tul hle a ti a. Social media a inziak naran leh mi thusawi chhawn ringawt awih mai lovin a dik leh dikloh finfiah (fact check) a pawimawh ; Mi tana hriat tlakloh information petu ah tang lo turin leh social media hmang sualtu ni lo turin college naupangte a fuih bawk.

Minister chuan thalaite chu an ngaihsan zawng te (value orientation) pawh a danglam chho tial tial chu lawmawm a ti hle a, ngaihsan tur dik tak ngaisang a, sual hua a do ngam turin leh dawt hnualsuat ngam turin a fuih bawk. Mahni thawhchhuaha hlawhtlinna rah chu a thlum bik thu sawiin, "Retheihna chu hlawhtlinna daltu a hmang lovin harsatna te chu tumruhna petu ni zawk se, retheihnate chu mi hlawhtlinga chherchhuaktu an ni fo zawk a ni," a ti. 

Khuallian chuan Mizo te chu a chhe zawnga insawi lovin, thatna lai inhmuhsak a, in fak tawn a, intichak tawn theuh turin a duh a sawi a. A eng zawnga thil thlir thin tu ni tura chahin ram hmasawnna kawngah theihtawp chhuahpui turin kalkhawmte a sawm bawk a ni.

Vawiina Vanapa hall-a Govt. Aizawl North College (GANC) ten September Ni 12, 2022 a hman tan College Week kharna hun an hmanah hian Yellow House-te hnenah lawmman pakhatna hlan an ni.