Aizawl; Nimin Inrinni zing dar 7 vel khan Sangau atanga S.Vanlaiphai lam panna Km 1 vela hla ah Thomjit Ali, Karimganj, Assam ruang chhar a ni. Sangau atanga thudawn danin ruang chhar tak Thomjit Ali hi Lalchhuanliana hnuaiah leirawhchan siam 'ZOMI Brick Industry' a inhlawhfa a ni a. He Brick rawhna hmunah hian hnathawktu Labour 6 bakah labour 6 te zinga vai pakhat hian nupui neiin an vaiin mi 9 an khawsa a ni. Vanduaina tawk ta Thomjit Ali hi December ni 31 zana chhuak kha a niin a tukah a la haw loh fo avangin a thiante mangang chuan YLA te an pun a, nimin zing khan a ruang hi hmuh a ni ta a ni. Thomjit Ali hian a lu ah hliam na tak a tuar a, hei hi a thihpui nia rin a ni. Thomjit Ali kutthlaktu hi hriat ni chiahlo mahse a bo zan atang hian a hnathawh pui zinga mi Shyab Uddin (30) Karimganj District, Assam a khawsa, nupui nei tawh leh fa pawh pali nei tawh chu a bo ve nghal a, he chanchin buatsaih lai thleng hian a awmna hriat a ni lo a, man tumin Police ten an zawng mek. Sangau PHC ah Doctor an awmloh avangin Thomjit Ali ruang hi Lawngtlai ah post mortem tura lak a ni a, vawiin chawhma lama post mortem zawh anih hunah Karimganj lam panpui a ni ang.