Aizawl: Serlui B Tuikhuah chhehvel khua Bilkhaw thlir, N.Chawnpui leh New Builum khuaa kuthnathawktu thlan bik te tan Fisheries Dept-in Serlui ‘B’ Tuikhuaha ‘Cage Culture Structure’ hmanga sangha a khawi tir te chuan 402 qtls an hralh tawh a, Rs nuai 14 vel hlawkna an tel bawk. Kolasib District fisheries Development Officer, Pu C.Laldawngliana sawi danin Serlui ‘B’ Tuikhuah-a Cage Culture Structure hmanga Sangha khawi hi kum 2013 atang khan Kolasib District Fishery Deptt kaihhruaiin Bilkhawthlir leh North Chawnpui khua a chhungkaw 48 ten bul an tan a, hemi hnu hian New Builum khua a chhungkaw 48 te tan sangha hi khawi leh a ni a, Fishery Dept in Sangha khawina tur Cage Structure an siam bakah Sangha chaw an tum vek a, Kuthnathawktute hian a chaw pek leh a enkawl hna an thawk thung a ni. He Cage Culture Structure hmanga Sangha khawi te hi Sangha phuhlip neilo chi a ni a, nikum kum tawp lam atang khan hralhchhuah tan ani a, Kg khat Rs 100 a hralhin vawiin thlengin Sangha Quintal 402 vel hralh tawhin Cheng Nuai 48 vel hmuh a ni. Sangha enkawltu te nen inremna angin, an sum hmuh te hi zat leh zata in sem a ni a, enkawltute te chuan Rs nuai 14 vel an tel tawh a ni. Cage Structure hi Block khat feet 15 bial niin, block 84 a awm a, chhungkaw 1-in Block khat zel enkawlin, heng Sangha te hi a tamzawk hralhchhuah tawh ani a, Cage structure hmang hian Sangha chi dang khawi leh turin Dept leh Kuthnathawktu te chu an inbuatsaih leh mek a ni.