Aizawl: Health & Family Welfare Department hnuaia Food & Drug hotute chuan Nilaini zanah sanghaa formalin awm leh awm loh an test chu a result an hre thei tih sawiin Formalin an hmuh loh thu leh Mizoram chhunga khap a tulna tur chhan a awm rih lo ni a an hriat thu ZALEN an hrilh. Food & Drug wing te hian kar hmasa Nilaini atang khan sanghaa Formalin a awm leh awm loh test hna hi an bei tan a, tunkar Nilaini zan khan result hmuin an sangha sample Bawngkawn bazara an lakah chuan Formalin pakhat mah hmuh a ni lo niin an sawi. Hetih rual hian state pawn atanga sangha lakluh khap tum a nih leh nih loh zawhna chhangin khapna chhan tur a awm rih lo niin ZALEN an hrilh a. “Kan test-naah kan hmuh rih loh miau chuan mi eizawnna han tihtawpsaka han khap kha a tul rih lo niin kan hria,” tiin an sawi a ni. Enfiah hna hi sangha a lo thlen rih loh avangin chhunzawm theih a ni rih lo tih sawiin Food & Drug hotute chuan test kit chah mek a lo thlen hunah chuan bazarah kal chilhin a test theih dawn bakah hmun leh hmunah result a hriat theih dawn thu an sawi bawk. Sanghaa Formalin hmuh vang hian India ram state hrang hrangah sangha lakluh an khap mek a, north east state zingah Manipur, Nagaland leh Assam pawhin an khap tawh bawk. Food & Drug hotute chuan central atangin thu a lo thlen thu leh hetah Formalin chu chiai chiamna tur a nih loh thu an sawi a. Sanghaah chulh lo ni ta se a phuhlip kan paih tlangpui avangin a hlauhawm loh tih te, 75 degree celcius aia sanga chhuan sat a nih chuan Formalin chu boruaka a ral vek theih thu te a inziak niin an sawi.