ZALEN, Oct. 13, 2024: Champion lai, Lalsangliana’n a vawi thum nan Mizo Inchai Palian title humhim turin amah chotu, Lalrinchhana Sailo lakah mipui hmuh châk inbawhbeh thlentir a tum.

Kum 34 mi, Sangliana chuan, “Ka inbuatsaihna a kal tluang chho a nih phawt chuan ka tum angin ka inlan theih ka ring a. Chutih rualin inhliam palh leh eng emaw thlen ve thei a ni a, thil awm dan tur sawi lawk theih a ni lo,” a ti.

Mizo inchaiah a tel tirh atangin a beih apiang a la hneh vek a, 2014 kha title a chuh hmasak ber niin champion lai, Lalnunfela bawhbeh zo lo mah se phu takin a hneh a. 2016-ah PB Lalnienga bawhbetin a vawi khat nan title a humhim a, kum hnih kal ta khan Fela nen inchai lehin inbawhbeh awm lo bawkin a hneh leh.

Kum 10 a champion tawh chhungin vawi thum chiah title fight a awm a, a la hmachhawn ngai loh North Vanlaiphai pa chak, Rinchhana nen December kar hnihnaah LPS Arena, Falkland-ah an innuai dawn.

April 2, 2003 khan a vawi hnih nan champion ropui, R Vanlalduata’n amah chotu Saidingliana Sailo a hneh hram a, thawh sawm an inchai chhungin inbawhbeh a awm lo. An intawn hmasak zawkah boruak a lian a, Duata’n tum ruk a bawhbeh laiin Saidinga’n tute mahin an la bawhbeh loh hi a bawhbet ve bawk a; mahse, an inbeih nawn lehnain mit a tlung zo lovin an inveng nasa a, kum 15 chhunga a beih apiang hneh vek chungin Duata a chawl zui ta a ni.

Hemi hnu atang hian Mizo Palian Inchaiah ngam taka inbeih aiin thiamna hmanga inven a hluar a, a vawrtawp inbawhbeh awm mang lova inchai tluang a awm tak fo avangin a hlutna pawh a tihniam a. Title Fight hnuhnung ber, November 17, 2022 khan Dawrpui Multipurpose Centre-ah Sangliana’n 20-0-in Fela hneh mah se a bawhbet miah lo va, a hmuhnawm tawk lo tia sawiselnain a um zui.

Upper Republic chhuanvawr Sangliana chuan, “Lehlam an inven chuan inbawhbet a harsa em em a, a tuartu tan a tlawm thlak bawk avangin bawhbeh kher ka tum vak lo thin bawk. Mahse, Mizo inchai tinung thar leh turin inbawhbet hi a tul hle tih a hriat a, mipui hmuh châk ber a nih bawk si avangin ka tihpuitlin theih ngei ka ring,” a ti.

December 9 atanga 11 chhungin LPS Arena, Falkland-ah Mizo Inchai title fight chi hrang paruk neih a ni dawn a, freestyle wrestling tihnun leh zual nan thlan bikten exhibition match an nei tel bawk ang. 

Kum 29 mi, Rinchhana’n Sangliana barakhaih turin a theihna a ring tawk a, chutih laiin dar hliamin a tihbuai avangin a hma lam hun tur sawi lawk harsa a ti a, dam tha taka a inpuahchah thei a nih chuan mipuiin champion thar an hmuh ngei a beisei.

August khan Lalremtluanga (Zobawk) leh Laldinthara (Zokhawthar) hneh ve vein a vawi khat nan Mizo Inchai Palian title chuh turin a tling a, a inbuatsaihnaah a dar ding lam tinain a la dam chiang lo.

“Tha ka pek nat deuh chuan ka banbulah hian nâ a la awm a, duh ang takin ka la hmang thei lo. Dam tha taka inpeih hman turin hun a la awm a, ka dinhmun tur erawh sawi lawk a harsa rih khawp mai.

“Ka duh anga ka inpeih hman a nih chuan chak theih ka inring a. A beih tawhte aia tawh khirh zawk ka nih ngei pawh ka ring a, a tan chet a awlsam bik lo khawp ang,” a ti.