Aizawl; Inrinni khan Mizo Award, Vanglaini chanchinbuin kum 2 dana a buatsaih thin chu Aijal Club-ah result puan a ni a, Sangthankima, Thutak Nunpuitu Team, Zuangtui chuan Mizo Award tum 2-na a dawng a, Brig. T Sailo, Mizo Award chelh mektu chuan Sangthankima a zin avangin a nupui Lalthakimi hnenah a Nopui a hlan a ni. Inkhawmah hian nominee 5 te chanchin chu kalkhawmte entir an ni bawk. "Nominee 5 zingah ka tel tih ka hriatin ka zak a, nominee dangte chanchin leh hmalakna ka ngaihsan thiau an ni vek a, Mizo Award ka dawng hi phu lo ka inti khawp mai. Ka lawm em em a, Pathian hmingin a buatsaihtute leh midang zawng zawng chungah lawmthu ka sawi a ni," tiin Sangthankima chuan Seling atangin Zalen palai a hrilh a. Kan palai zawhna chhang zelin Krismas a an enkawlte thuamhnaw ngaihtuah a ngaihthu leh a huphurh thu a sawi a, " Pheikhawk 1 man pawh a to si a, kan huphurh khawp mai, mahse Pathianah kan innghat tawp a ni," tiin a sawi bawk. Vanglaini chan-chinbu Editor K. Sapdanga chuan thusawiin, "Tuna nominee-a thlan chhuah te hi inel an ni loa, tling emaw tling lo an awm lo a. Nominee te hi mihring ve tho an ni a, famkim leh sawiselna tur nei lo an ni bik lo. Mizoram leh Mizo mipui te tana mi thahnemngai leh thawhhlawk ber berte an ni," a ti. Award buatsaih a nih chhan sawiin, "Vanglaini chanchinbu tun dinhmun a thlen theihna chhan chu Mizo mipuite vang a ni a, Award siam hi mipuite lakah kan ba niin kan hria a, mi tam tak, mi tha tak tak puan tur tam tak Mizote hian kan la nei a ni," a ti bawk. Inkhawm kai hruaitu Lalnghinglova Hmar chuan chawimawina pek a nih dan a sawifiah a, Nomination Committee-ah mi 5 an awm a, nominee 5 leh Selection Committee atan mi 20 ruat niin he committee 'point system' hmangin an thlang tih a sawi Mizo Award hian Rs Nuai 1 a keng tel a ni.