Aizawl: NLUP leh RKVY Convergence Scheme hnuaiah Tuikum Cluster-a sapthei chingtu chhungkaw 444 te hnenah Zirtawpni khan NLUP 2nd installment sem a ni. NLUP sem inkhawma khuallian MIFCO Chairman P.C. Zoram Sangliana chuan sapthei chingtute chu tlangram lo neih bansan a, kum tin lo hal pumpelh tura an hmalaknaah theih tawp chhuah turin a fuih. NLUP leh RKVY Convergence Scheme hnuaiah hian sapthei chingtute hnenah Rs. 1,20,000 theuh sem tura ruahman a ni a, a tirah sapthei chingtu thlan chhuah chhungkaw 601 hnenah tanpuina hi installment-in pek a ni a, uluk taka endik hnuah hna thawk thalo leh chhunzawm tlaklo chhungkaw 176 chu paihin tunah hian chhungkaw 444 hnenah tanpuina hi pek chhunzawm an ni ta a ni. Sapthei chinga eizawngtute zingah NLUP chu 70% velin a hlawhtling ni a hriat a ni bawk. Tuikum Cluster hnuaia sapthei chingtute leh a lei saktu MIFCO te hian an thar chhuah zawng zawngte leisak turin inremna an siam a. He hmalakna atang hian nikum hmasa (2015-16) atang khan sapthei hi an lei sak tan a, a man pawh an pe nghal a ni. MIFCO in nikum 2016-17 chhung a sapthei an lei zawng zawng quintal 1736.79 atangin quintal 726.59 zet chu Tuikum cluster hnuaia thar chhuah a ni.