October 26, 2023; Aizawl West I ZPM official candidate TBC. Lalvenchhunga'n covid harsatna kan tawh lai pawhin Kamrula bill a tang lo a, Abu Mazumddar a buhfai supply to bik pawh bill a tang ngai lo niin a sawi a, SASCI sum party induhsakna atana hmangah sawrkar a puh.

Vawiin a Aizawl Press Club a thuthar thehdarhtute a kawmna ah he thu hi sawiin, TBC Lalvenchhunga chuan Kamrula leh Abu Mazumdar a te bil a tan loh laiin, mipui healthcare bill leh SEDP erawh pe thei lo sawrkar kum 5 kan rawn niin a sawi bawk.

SASCI chu loan a nih thu leh central grant a nih loh thu te sawi bawkin, covid harsatna vanga central sawrkarin state te hnena loan a offer a nih thu leh state thenkhat chuan leiba an ngah avangin an la duh lo niin a sawi.

SASCI atangin tun kum 3 chhungin Rs. vbc. 993.1976 rulh leh turin Mizoram sawrkarin a puk tawh nia sawi bawkin, TBC Lalvenchhunga chuan, SASCI sum puk hmang hian hmasawnna ruhrel din lovin, party induhsakna atan mai bakah, CM meuhin bial vil nana an hman thu a sawi chhuak hial niin a sawi bawk.

Mizoram sawrkar in covid avanga sum dawn kim loh Rs. vbc. 2636.52 kan nei tiin, chhuanlam siamin sawi lan teh ah an nei thin tih TBC Lalvenchhunga chuan sawiin, kum 2019-20 atanga 2022-23 thlenga kan budget hmuh tur beisei aia tam kan hmuh belh chu Rs. vbc. 2563.17 a ni tih a sawi a, covid chhuanlam a kan sum hmuh loh an sawi ziah Rs. vbc. 2636.52 leh kan dawn belh zat inthlauhna hi Rs. vbc. 73.35 chiah a ni, a ti bawk.