Aizawl;Association for Environment Protection (ASEP) leh CAMPA (Compensatory afforestation fund manegement and planning authority) huaihawtin nimin khan Aizawl Zoological Park, Sakawrtuichhun ah 'sava veh runpui' neih a ni a. He hunah hian ASEP member te bakah Aizawl khawpuia nature & environment a tui te, wildlife photographer leh Environment & Forests thawktu mi engemaw zat an tel a ni. Nimin sava veh thupui atan hian 'shoot with camera, not with a gun' tih hman a ni a, he huna kal te hian camera hmangin ramsa chi hrang hrang thla an la a ni. ASEP President K.Lalmuansanga chuan sava veh runpui an buatsaih chhan chu Mizo mipuite rilru ah sava veh dan thlak danglam an tum vang a ni tih a sawi a. Mizoram ah nature environment leh wildlife photographer an pung chho zel te, Facebook lamah pawh hetiang lam thlalakin hmun a changsang zel chu lawmawm a tih thu a sawi bawk. Nimin Aizawl Zoological Park a sava veh runpui neih rual hian Aizawl khaw pawn Lawngtlai, Serchhip, Lunglei, Champhai leh hmun dangah pawh hetiang hun hi hman a ni a. Tun tum hi hetiang hun hman vawikhatna a niin hun remchang ah la tih leh zel tum a ni a, he huna thlalak hrang hrangte hi remchang hmasa berah tlangzarh a ni ang.